Папулярны дадатак для знаёмстваў Tinder спыняе працу ў Беларусі

16 студзеня, Позірк. Брэнды амерыканскай кампаніі Match Group, уключаючы Tinder, збіраюцца “закрыць свае сэрвісы ў Беларусі”, паведамляе прэс-служба кампаніі.

Чакаецца, што доступ да іх у краіне будзе недаступны з 15 лютага: “Калі вы знаходзіцеся ў Беларусі, вы не зможаце выкарыстоўваць сэрвісы Tinder або ўвайсці ў свой уліковы запіс”.

Таксама з гэтай даты карыстальнікі, якія знаходзяцца ў Беларусі, “больш не змогуць здзяйсняць пакупкі ў дадатку, уключаючы новыя падпіскі Tinder (напрыклад, Tinder Gold) або расходныя матэрыялы (напрыклад, суперлайкі і бонусы)”.

Прычыны рашэння не называюцца.

Tinder — адзін з самых папулярных у свеце мабільных дадаткаў для знаёмстваў. Ён выкарыстоўвае геаграфічныя даныя месцазнаходжання і сацыяльную сетку Facebook. Існуе з 2012 года.

У чэрвені мінулага года прыкладанне перастала працаваць у Расіі.

Раней з РФ і Беларусі сышлі некаторыя заходнія брэнды — у сувязі з вайной супраць Украіны, якая праводзіцца Масквой і падтрымліваецца афіцыйным Мінскам.