18 кастрычніка, Позірк. Больш за 1,5 тыс. вайскоўцаў запасу прымае ўдзел у зборах унутраных войскаў МУС, паведамляе іх прэс-служба.
Адзначаецца, што байцы добраахвотніцкага атрада “Смерч” і асацыяцыі ветэранаў падраздзяленняў спецыяльнага прызначэння войскаў МУС “Гонар” “на працягу некалькіх дзён адточваюць свае навыкі па агнявой, тактычнай, медыцынскай падрыхтоўцы”.
“Шырокая баявая падрыхтоўка добраахвотнікаў, якія раней праходзілі службу ў спецпадраздзяленнях унутраных войскаў і органаў унутраных спраў, уключала ў сябе адпрацоўку тактычных перамяшчэнняў на полі бою, дзеянняў на спецыяльным транспарце, вывучэнне новых відаў узбраення, у тым ліку АГС, а таксама ажыццяўленне разведкі мясцовасці з дапамогай БЛА”, — гаворыцца ў паведамленні.
Аб стварэнні атрада “Смерч” стала вядома ў лістападзе 2022-га года. 19 лістапада ў інтэрв’ю ведамаснаму часопісу “Спецназ” намеснік міністра ўнутраных спраў — камандуючы ўнутранымі войскамі Мікалай Карпянкоў заявіў, што акрамя барацьбы з дыверсантамі, “Смерч” будзе выконваць задачы “па забеспячэнні ваеннага становішча, надзвычайнага становішча, прававога парадку пры правядзенні контртэрарыстычнай аперацыі”.
Кіраўнік МУС Іван Кубракоў 24 лістапада на тэлеканале АНТ паведаміў, што ў новым атрадзе спецназа будуць сярод іншага “падраздзяленні разведкі, па супрацьдзеянні беспілотным лятальным апаратам, свая кіналагічная служба”. Гэтае фармаванне “будзе мабільным”, яго аснасцяць “бронетэхнікай і адпаведным узбраеннем”.
13 красавіка Карпянкоў паведаміў у эфіры тэлеканала СТВ, што ў МУС фарміруюцца добраахвотніцкія падраздзяленні ўнутраных войскаў колькасцю каля тысячы чалавек.
Аўтарызавацца
Забыліся пароль?
Выхад з профілю
