КДБ прызнаў “экстрэмісцкім фарміраваннем” Асацыяцыю беларускага бізнесу за мяжой

19 кастрычніка, Позірк. Камітэт дзяржаўнай бяспекі 13 кастрычніка прызнаў “экстрэмісцкім фарміраваннем” Асацыяцыю беларускага бізнесу за мяжой (ABBA), вынікае з абноўленага спісу на сайце МУС.

Сцвярджаецца, што “група грамадзян ажыццяўляе экстрэмісцкую дзейнасць у тым ліку праз інтэрнэт-рэсурсы, аб’яднаныя пад агульнай назвай Асацыяцыя беларускага бізнесу за мяжой пад кіраўніцтвам Бурага Я. В. і Гірын М. Ч.”.

Гаворка пра кіраўніка ABBA былога супрацоўніка дзяржсакратарыята Савета бяспекі Беларусі Яўгена Бурага і віцэ-прэзідэнта асацыяцыі Марыну Гірын.

У спісе пералічаныя медыярэсурсы, якія звязаныя з “экстрэмісцкім фарміраваннем”, у прыватнасці сайт асацыяцыі, яе старонкі ў “Інстаграме”, “Твітары”, акаўнт у “ЛінкедІн” і ютуб-канал.

ABBA створаная ў жніўні 2021 года.

У верасні 2023 года беларускі дэмакратычны лідар Святлана Ціханоўская абмяркоўвала з кіраўніцтвам ABBA, даследчага цэнтра BEROC і стартап-хаба Imaguru спосабы дапамогі прыватнаму беларускаму бізнесу.

На III Беларускім бізнес-форуме 20 верасня ў Варшаве асацыяцыя і Міністэрства гандлю ЗША прынялі “дарожную карту” супрацоўніцтва. У дакуменце прапісаныя канкрэтныя механізмы садзейнічання АВВА з боку Мінгандлю ЗША шляхам арганізацыі бізнес-форумаў, падтрымкі дзейнасці членаў асацыяцыі, дапамогі ў правядзенні маркетынгавых даследаванняў ды інш.

Тады ж Гірын анансавала правядзенне беларускага бізнес-форуму ў Вашынгтоне на пачатку 2024 года.