Тайвань увёў абмежаванні на пастаўкі станкоў у Беларусь і РФ
8 лютага, Позірк. Мінэканомікі Тайваня ўвяло абмежаванні на пастаўку станкоў у Беларусь і Расію, паведамляе ведамства.
Абмежаванні ўводзяцца ў дачыненні да 77 відаў станкоў з 8 сакавіка ў сувязі з тым, што гэта абсталяванне можа мець шырокі спектр прымянення, у тым ліку ў ваеннай сферы.
Мінэканомікі рэкамендавала вытворцам разарваць сувязі з адпаведнымі беларускімі і расійскімі пакупнікамі.
Асобна адзначаецца, што для выключэння атрымання Беларуссю і РФ высокатэхналагічных тавараў з Тайваня праз трэція краіны вытворцы абавязаныя выразна паказваць у дакументацыі канчатковага атрымальніка тавараў пры экспарце ў краіны з “высокімі перавалачнымі рызыкамі”. Такімі краінамі названыя Турцыя, Аб’яднаныя Арабскія Эміраты і інш.
Акрамя гэтага, Мінэканомікі Тайваня павялічыла больш чым у 15 разоў сумы штрафаў за незаконны экспарт у Беларусь і Расію.
З 25 студзеня Тайвань пашырыў абмежаванні на экспарт у Беларусь і Расію. У пералік тавараў уключаныя яшчэ 45 пазіцый. Ведамства заклікала пастаўшчыкоў “выконваць унутраныя і міжнародныя правілы экспартнага кантролю, выконваць свае абавязацельствы па праверцы і пазбягаць парушэнняў, якія могуць паўплываць на іх рэпутацыю, а таксама іх уласныя правы і інтарэсы”.
13 студзеня Міністэрства замежных спраў Беларусі ў сувязі з выбарамі прэзідэнта Тайваня заявіла, што Мінск “цвёрда падтрымлівае” прынцып “аднаго Кітая”, які з’яўляецца “залогам стабільнасці і ўстойлівага развіцця ўсяго рэгіёну”.
На выбарах прэзідэнта Тайваня 13 студзеня перамогу атрымаў 64-гадовы старшыня кіруючай Дэмакратычнай прагрэсіўнай партыі Лай Цындэ — праціўнік кантролю над востравам з боку Кітая.
Раней кіраўніцтва КНР, якое лічыць дэ-факта непадкантрольны Тайвань часткай сваёй краіны, папярэджвала аб павышэнні рызыкі канфлікту, калі ва ўладзе ў Тайбэі застануцца праціўнікі збліжэння з Пекінам. Перад выбарамі кітайская армія павялічылі актыўнасць вакол вострава. Існуе верагоднасць, што Кітай паспрабуе ўстанавіць над Тайванем кантроль ваенным шляхам, калі той абвесціць незалежнасць.
