Сем пасажыраў мікрааўтобуса шпіталізавалі пасля аварыі ў Віцебскім раёне (удакладнена)
дададзены абзацы 4–7, з улікам удакладненай інфармацыі дзяржорганаў актуалізаваны загаловак
12 лютага, Позірк. Пасля аварыі, якая адбылася 12 лютага каля вёскі Курына (Віцебскі раён), шпіталізацыя спатрэбілася сямі пасажырам мікрааўтобуса, паведамляе галоўнае ўпраўленне па ахове здароўя Віцебскага аблвыканкама.
Адзначаецца, што на месцы здарэння працавалі тры брыгады хуткай дапамогі. Трох пацыентаў даставілі ў Віцебскую абласную клінічную бальніцу, чатырох — у Бальніцу хуткай медыцынскай дапамогі.
“У іх спалучаныя траўмы: чэрапна-мазгавыя траўмы, пераломы, удары, ранкі мяккіх тканін твару. Стан пацыентаў ацэньваецца як сярэдняй ступені цяжкасці. Сярод пацярпелых дзяцей няма. Усім пацыентам праводзяцца ўсе неабходныя лячэбна-дыягнастычныя мерапрыемствы”, — гаворыцца ў паведамленні.
Дзяржаўтаінспекцыя Віцебскай вобласці паведамляе, што аварыя адбылася каля 8:00 на 5-м кіламетры аўтадарогі Н2301 “Руба — Тарасенкі — мяжа Расійскай Федэрацыі”.
Паводле папярэдняй інфармацыі, 62-гадовы кіроўца мікрааўтобуса Volkswagen, вяртаючыся ў сваю паласу пасля выезду на паласу сустрэчнага руху, сутыкнуўся з грузавіком “МАЗ”, які “рухаўся наперадзе ў спадарожным кірунку”.
Па факце дарожна-транспартнага здарэння праводзіцца праверка.
Удакладненне. Паводле новай інфармацыі Міністэрства аховы здароўя, мікрааўтобус, які трапіў у аварыю, не быў маршрутным таксі, як раней паведамлялі дзяржорганы.
