Вальфовіч арыентаваў СК на “аператыўнае рэагаванне на ўсе выклікі і пагрозы” падчас выбараў
Падчас паседжання калегіі СК
16 лютага, Позірк. У перыяд электаральнай кампаніі “вельмі важна якаснае і аператыўнае рэагаванне на ўсе выклікі і пагрозы”, заявіў дзяржаўны сакратар Савета бяспекі Аляксандр Вальфовіч на 16 лютага на пасяджэнні калегіі Следчага камітэта, паведамляюць дзяржСМІ.
На ягоную думку, следчыя — “той надзейны шчыт, як у вас на шаўроне, які забяспечвае абарону нацыянальных інтарэсаў”.
Вальфовіч запатрабаваў зрабіць упор у працы СК на якасць папярэдняга расследавання і службовую дысцыпліну, таму што “чалавек у пагонах не мае права на памылку”.
Паводле словаў кіраўніка СК Дзмітрыя Гары, у краіне назіраецца штогадовае зніжэнне агульнага ўзроўню злачыннасці: “У 2023 годзе агульны ўзровень злачыннасці знізіўся на 3,5%. Гэта звязана з пазітыўнымі зменамі, якія адбываюцца ў нашым грамадстве, зладжанай працай праваахоўнікаў. Пры гэтым, разам з агульным узроўнем злачыннасці, мы адзначаем рост цяжкіх і асабліва цяжкіх злачынстваў. Але гаворка ідзе не пра гвалтоўныя злачынствы. Гэты рост мы адзначаем за кошт павышэння ўзроўню кіберзлачыннасці”.
Аб гатоўнасці судоў да спроб сарваць выбары заявіў на прэс-канферэнцыі 16 лютага намеснік старшыні Вярхоўнага суда Валерый Калінковіч.
“Мы зробім усё для таго, каб з боку судовай улады было забяспечана правільнае і своечасовае вырашэнне тых пытанняў, якія ўзнікаюць у ходзе выбарчай кампаніі”, — сказаў ён.
У гэтым годзе ўпершыню ў Беларусі пройдуць аб’яднаныя выбары ў Палату прадстаўнікоў Нацыянальнага сходу (ПП НС) і мясцовыя саветы дэпутатаў. Адзіны дзень галасавання прызначаны на 25 лютага.
На 110 месцаў у ПП НС восьмага склікання прэтэндуе 265 кандыдатаў, на 12.512 месцаў у мясцовых саветах дэпутатаў — 18.802. Сярэдні конкурс — 2,4 і 1,5 чалавека на месца адпаведна. Сярод кандыдатаў няма праціўнікаў рэжыму Аляксандра Лукашэнкі.
Электаральная кампанія праходзіць на фоне маштабных рэпрэсій і зачысткі палітычнага поля ад апазіцыі, у гэтым актыўна ўдзельнічае судовая сістэма.
З 1996 года незалежныя назіральнікі не прызналі ніводную выбарчую кампанію ў Беларусі транспарэнтнай і адпаведнай стандартам АБСЕ.
11 лютага намеснік міністра ўнутраных спраў — камандуючы ўнутранымі войскамі Мікалай Карпянкоў дапусціў удзел наймітаў расійскай прыватнай ваеннай кампаніі “Вагнер” у мерапрыемствах МУС у перыяд выбараў.