19 лютага, Позірк. Чарга на замену тазасцегнавага сустава з 23 траўня 2023 года скарацілася на 17%, каленнага сустава — на 10%, паведаміў у эфіры тэлеканала АНТ міністр аховы здароўя Аляксандр Хаджаеў.
На нарадзе 23 траўня Аляксандр Лукашэнка запатрабаваў ад тагачаснага міністра Дзмітрыя Піневіча да канца года ліквідаваць чаргу на эндапратэзаванне суставаў. Паводле слоў Піневіча, чарга на той момант складала 13,5 тыс. чалавек. Улетку намеснік міністра аховы здароўя Юрый Горбіч, рэагуючы на патрабаванне Лукашэнкі ліквідаваць чаргу, заявіў аб дэфіцыце матэрыялаў, а таксама парушэнні лагістычных ланцужкоў пры вытворчасці пратэзаў.
Як заявіў цяпер Хаджаеў, “па тазасцегнавых суставах у нас існуе чарга 11.779 чалавек, па каленных суставах у нас чарга 14.058 чалавек”.
Міністр падкрэсліў, што “праблема сістэматычна вырашаецца” і “яна будзе вырашана”. Таксама ён адзначыў, што Міністэрства аховы здароўя ўзаемадзейнічае з кампаніяй “Палітэхнік”, “якая сумесна з кітайскай кампаніяй “Вегаё” паставіць на рынак Беларусі 4 тыс. пратэзаў тазасцегнавых, 2 тыс. пратэзаў каленных і інструментарый для іх устаноўкі”.
23 студзеня міністр адукацыі Андрэй Іванец заявіў, што ў 2023 годзе навукова-тэхналагічны парк “Палітэхнік” Беларускага нацыянальнага тэхнічнага ўніверсітэта атрымаў сертыфікат на вытворчасць эндапратэзаў каленнага сустава.
У 2022 годзе ўлады ініцыявалі “справу артапедаў”: медыкі нібыта атрымлівалі незаконныя ўзнагароды ад прыватных кампаній, якія пастаўлялі некаторыя віды медыцынскіх вырабаў, у тым ліку суставы для імплантацыі. 35 артапедаў было затрымана.
Піневіч папрасіў у Лукашэнкі дазволу ўзяць на парукі абвінавачаных у хабарніцтве ўрачоў. Той пагадзіўся, выставіўшы ўмовы: яны павінны прызнаць віну, аддаць незаконна атрыманыя сродкі, пайсці на працу, якую прапануе міністр.
“Прафесію артапеда зараз разбураюць. Гэта нельга растлумачыць нейкай карупцыяй — барацьба з карупцыяй выглядае інакш. Тут проста зразаецца цэлы пласт спецыялістаў, і прафесія дэзарыентаваная”, — пракаментаваў “Позірку” сітуацыю з масавымі арыштамі артапедаў урач-рэаніматолаг Уладзімір Мартаў.
Да моманту інтэрв’ю з ім “усіх выпусцілі, перавялі на новыя месцы працы”. “Мы не ведаем, што адбылося. Акрамя агульных абвінавачванняў па тэлебачанні, нічога невядома. Людзі пасядзелі, зараз выплачваюць нейкія грошы. Ні судоў, ні прысудаў, ні галоснага абмеркавання”, — заявіў Мартаў.
Паводле яго слоў, было затрымана больш за 30 чалавек, а артапедаў, якія могуць выконваць складаныя высокатэхналагічныя аперацыі, у Беларусі “агулам, можа, паўсотні”.
У верасні 2022 года Міністэрства аховы здароўя прыпыніла працу медцэнтра “Мерсі”, пабудаванага пры падтрымцы Сусветнага банка. Беларускі расследацыйны цэнтр (БРЦ) адзначаў, што некаторы час “Мерсі” быў адзінай медустановай у краіне, дзе было магчыма паставіць імпартны пратэз пры пратэзаванні тазасцегнавага сустава. Такую прэферэнцыю БРЦ звязваў са складам заснавальнікаў і іх знаёмствам з набліжанымі да Аляксандра Лукашэнкі бізнэсмэнамі і ягоным старэйшым сынам Віктарам.
