З нагоды Дня роднай мовы АПК абвясціў узнагароды за ўнёсак у захаванне і папулярызацыю беларускай мовы

21 лютага, Позірк. З нагоды Дня роднай мовы Аб’яднаны пераходны кабінет (АПК) прыняў рашэнне ўзнагародзіць “выбітных людзей за ўнёсак у захаванне і папулярызацыю беларускай мовы”, паведаміла прэс-служба АПК.

Медалём Францыска Скарыны ўзнагароджаныя палітык і мовазнаўца Вінцук Вячорка, грамадска-палітычны дзеяч, паэт, празаік Уладзімір Някляеў, беларусістка, першая амбасадарка Польшчы ў Беларусі Эльжбета Смулкова, старшыня Рады Беларускай Народнай Рэспублікі Івонка Сурвіла, перакладчык, журналіст Сяргей Шупа і яшчэ чатыры чалавекі, імёны якіх не раскрываюцца з прычын бяспекі.

Медалём “Гонар і годнасць” узнагароджаныя доктар філалагічных навук Ніна Баршчэўская, дырэктар Беларускага ліцэя ў Гайнаўцы (Польшча) Ігар Лукашук, паэтэса і перакладчыца Ванда Марцінш (беларуская дыяспара Літвы), выдавец Андрэй Янушкевіч і яшчэ дзве асобы, імёны якіх таксама не раскрываюцца.

Кандыдатуры ўзнагароджаных прадстаўленыя камісіяй па ўзнагародах пры Аб’яднаным пераходным кабінеце.

Прадстаўніца па нацыянальным адраджэнні АПК Аліна Коўшык адзначыла, што кожны з узнагароджаных “зрабіў вялікі ўнёсак у захаванне і папулярызацыю беларускай мовы, гэта прафесіяналы сваёй справы”. 

Міжнародны дзень роднай мовы быў заснаваны рашэннем 30-й сесіі Генеральнай канферэнцыі ЮНЕСКА ў лістападзе 1999 года і адзначаецца 21 лютага з 2000 года дзеля абароны моўнай і культурнай разнастайнасці.

Аб’яднаны пераходны кабінет заснаваў медаль “Гонар і годнасць” як узнагароду за выключную адданасць Беларусі ў лютым 2023 года.

Пра медаль Францыска Скарыны, якая сугучна з афіцыйнай беларускай узнагародай, раней не паведамлялася.