Большасць беларускіх франшыз распрацоўваецца для развіцця сеткі ў РФ— кіраўнік профільнай асацыяцыі

1 сакавіка, Позірк. У 2023 годзе ў Беларусі зарэгістравана 175 дагавораў франчайзінгу, што на 28% больш, чым годам раней, паведаміла ў інтэрв’ю “Эканамічнай газеце” старшыня Асацыяцыі франчайзераў і франчайзі “Белфранчайзінг” Вольга Лявонцьева.

Пры гэтым яна адзначыла, што не ўсе фактычныя здзелкі праходзяць рэгістрацыю ў Нацыянальным цэнтры інтэлектуальнай уласнасці: “Часам гэта выклікана розніцай у заканадаўстве, якое рэгулюе здзелкі [у розных краінах], часам — бестурботнасцю удзельнікаў здзелкі”.

Найбольшая колькасць зарэгістраваных дагавораў — гэта, як і раней, купля франшызы ў грамадскім харчаванні, у тым ліку кава-пойнты, і рознічным гандлі.

Попыт на набыццё франшызы летась у параўнанні з 2022 годзе, паводле звестак асацыяцыі, павялічыўся на 11%. Штогадовы рост колькасці зарэгістраваных дамоваў адзначаецца з 2015 года, удакладніла Лявонцьева.

“З прычыны знешняй сітуацыі апісаная тэндэнцыя захоўваецца: 40% франшыз на нашым рынку беларускія (упершыню з 2016 года), 38% — расійскія, 7% франшыз з іншых постсавецкіх краін, 5% — з Еўропы, яшчэ 10% — з ЗША, Азіі і з іншых тэрыторый”, — сказала кіраўнік аб’яднання.

Расія, паводле яе слоў, была і застаецца буйным рынкам, большая частка беларускіх франшыз распрацоўваецца з намерам развіваць сетку менавіта ў гэтай краіне, ёсць нямала паспяховых прыкладаў, у першую чаргу сярод франшыз магазінаў адзення, абутку, бялізны. Таксама гаворка ідзе аб пунктах выдачы заказаў, паштовых паслугах, сушы-барах, пякарнях.

У той жа час расійскія франшызы “разглядаюць нашу краіну для развіцця <…> сеткі” ва ўмовах, калі яны “абмежаваныя ў магчымасцях развівацца ў іншых краінах”, паведаміла Лявонцьева.

Агулам, паводле яе даных, замежных франшыз, якія працуюць на беларускім рынку, больш, чым беларускіх, якія выйшлі ў іншыя краіны.

Асноўнымі праблемамі развіцця франшыз у Беларусі яна назвала падбор персаналу, пошук памяшканняў, а таксама “недастатковую колькасць запытаў на куплю франшызы”.