СМІ: 8 сакавіка Латвія ўвядзе забарону на ўвоз гародніны, садавіны ды іншай сельгаспрадукцыі з Беларусі і РФ
6 сакавіка, Позірк. З 8 сакавіка Латвія ўводзіць забарону на ўвоз у краіну гародніны, садавіны і некаторай іншай сельскагаспадарчай прадукцыі з Расіі і Беларусі, паведамляе мясцовы партал LSM.
Паводле інфармацыі медыя, пад забарону трапяць бульба, памідоры, часнык, цыбуля, цыбуля-шалот, цыбуля-парэй і іншая цыбульная гародніна, капуста, каляровая капуста, кальрабі, ліставая і аналагічная ядомая капуста, салата-латук, морква, сталовая рэпа і бручка, сталовыя буракі, салера, радыска і падобныя карняплоды, агуркі і карнішоны, бабовыя і іншая замарожаная, кансерваваная і сушаная гародніна. Таксама будзе немагчыма імпартаваць маніёк, трысняговую маранту, салеп, тапінамбур, батат і аналагічныя карняплоды з высокім утрыманнем крухмалу або інуліну.
Паведамляецца, што забарона на імпарт таксама закране какосы, бразільскія арэхі, кеш’ю і іншых арэхаў, бананаў, фінікаў, інжыра, ананасаў, авакада, гуавы, манга і мангасціна, цытрусавых, вінаграду, дыні і папаі, яблыкаў, груш і айвы, абрыкосаў, вішняў, персікаў, сліў і іншай свежай садавіны і ягад, у тым ліку чарніц. Нельга будзе ўвозіць замарожаную, кансерваваную і сушоную садавіну і арэхі, лупіну цытрусавых або дыні і кавуна.
Будзе забаронены ўвоз пшаніцы, сумесі пшаніцы і жыта, жыта, ячменю, аўса, кукурузы, рысу, збожжавага сорга і грэчкі.
Забарона на імпарт будзе распаўсюджвацца на муку і гранулы з мяса або мясныя субпрадукты, рыбу і ракападобных, малюскаў і іншых водных бесхрыбтовых, вотруб’е, рэшткі вытворчасці крухмалу і аналагічныя рэшткі, адкіды цукровай вытворчасці, соевыя бабы, арахісавае масла, насенне бавоўны, лёну, рапсу, какосавы або пальмавы алей ды інш.
У анатацыі адпаведных правілаў гаворыцца, што Латвія як краіна, якая мяжуе з РФ, спрабуе дамагчыся “хутчэйшага разрыву эканамічных сувязяў з краінай-агрэсарам”. Ініцыятыва Рыгі забараніць увоз сельскагаспадарчай і кармавой прадукцыі з РФ, Беларусі і іншых краін, калі адпаведная прадукцыя мае расійскае ці беларускае паходжанне, названая “дадатковым элементам агульнай санкцыйнай палітыкі Еўрасаюза”.
Паводле інфармацыі партала, міністр сельскай гаспадаркі Армандс Краўзэ заявіў на пасяджэнні ўрада, што першапачаткова ў спіс забароненых у Латвіі прадуктаў расійскага і беларускага паходжання планавалася ўключыць толькі збожжавыя, але пасля перагавораў з латвійскімі фермерамі было вырашана яго пашырыць. Пад забарону не трапілі прадукты жывёльнага паходжання, шэраг прадуктаў расліннага паходжання, але “маецца магчымасць пашырыць спіс”, падкрэсліў чыноўнік.
3 студзеня ў эфіры Латвійскага тэлебачання міністр транспарту Каспарс Брышкенс заявіў, што санкцыі Еўрапейскага саюза неабходна распаўсюдзіць на імпарт і транзіт збожжа з Беларусі і Расіі. Варта адзначыць, што Беларусь збожжа на экспарт не пастаўляе.
Прэм’ер-міністр Польшчы Дональд Туск падчас прэс-канферэнцыі ў Вільнюсе 4 сакавіка заявіў пра намер ініцыяваць увядзенне “поўных санкцый” на ўвоз у Еўрасаюз сельскагаспадарчых і харчовых тавараў з Беларусі і Расіі.
