9 сакавіка, Позірк. Мінскі гарадскі суд 20 сакавіка разгледзіць іск Міністэрства юстыцыі аб ліквідацыі грамадскага аб’яднання “Беларуская асацыяцыя ахвяр палітычных рэпрэсій”, вынікае з раскладу на сайце электроннага судаводства.
Суддзя Наталля Пясенка пачне працэс у 10:00.
Згодна з данымі з Адзінага дзяржаўнага рэгістра юрыдычных асоб і індывідуальных прадпрымальнікаў, асацыяцыя зарэгістраваная 5 чэрвеня 1992 года.
Сярод іншага арганізацыя займаецца месцамі пахавання ахвяр сталінскіх рэпрэсій, удзельнічала ў абароне ўрочышча Курапаты пад Мінскам. Паводле звестак спецыялізаванага рэсурсу “Архівы Беларусі”, у Нацыянальным архіве Беларусі захоўваюцца сабраныя асацыяцыяй у 1990-х гадах дакументы, у тым ліку ўспаміны рэпрэсаваных грамадзян і іх сем’яў, спісы рэпрэсаваных і рэабілітаваных грамадзян.
Адметна, што 2 лютага Вярхоўны суд прыняў рашэнне аб ліквідацыі падобнай арганізацыі — Беларускага грамадскага аб’яднання ахвяр палітычных рэпрэсій 20–80 гадоў, якое афіцыйна існавала з 29 лістапада 1999 года.
Згодна з інфармацыяй партала электроннага судаводства, згаданы Мінгарсуд 22 сакавіка пачне разгляд іску Мінюста аб ліквідацыі сацыяльна-экалагічнага грамадскага аб’яднання “Цэнтр падтрымкі чарнобыльскіх ініцыятыў”. Арганізацыя зарэгістраваная 2 сакавіка 2009 года.
Летась увосень гэты ж суд задаволіў іскі міністэрства аб закрыцці дзвюх іншых арганізацый, звязаных з дапамогай пацярпелым ад аварыі на ЧАЭС, — грамадскага аб’яднання “Беларускі камітэт “Дзеці Чарнобыля” (ліквідаванае 20 кастрычніка) і грамадскага аб’яднання “Крок ад Чарнобыля” (20 лістапада).
