Дзяржпагранкамітэт: За выхадныя на мяжы з Польшчай і Латвіяй знойдзены два трупы і збіты замежнік

11 сакавіка, Позірк. За выхадныя на мяжы з Польшчай і Латвіяй знойдзены два трупы і збіты замежнік, паведамляе прэс-служба Дзяржаўнага пагранічнага камітэта.

Паводле інфармацыі ведамства, 9 сакавіка паблізу “брамкі для жывёл” у польскім плоце пагранічнікі знайшлі цела, на якім былі “выразна бачныя гематомы і ранкі”. Адзення на ім не было.

Паведамляецца, што 10 сакавіка на мяжы з Латвіяй памежнікі выявілі “мужчыну з гематомамі, які знаходзіўся ў шокавым стане”. Замежнік, як сцвярджае Дзяржпагранкамітэт, заявіў, што быў “жорстка збіты латвійскімі сілавікамі”, якія “зламалі яго тэлефон і вытурылі праз плот без ежы і вады”.

Праз паўгадзіны пасля выяўлення збітага мужчыны беларускія памежнікі знайшлі “каля брамкі ў латвійскім плоце” яшчэ аднаго чалавека, але ён быў мёртвы.

Паводле інфармацыі Дзяржпагранкамітэта, з пачатку года беларускія пагранічнікі знайшлі трупы чатырох мігрантаў — па два на мяжы з Польшчай і Латвіяй.