Беларускія вайскоўцы грузяць тэхніку на чыгуначныя платформы, пункты прызначэння не называюцца

12 сакавіка, Позірк. У рамках “праверкі баявой гатоўнасці злучэнняў і вайсковых часцей” праведзена “пагрузка ўзбраення і вайсковай тэхнікі на чыгуначны транспарт”, паведаміла 12 сакавіка прэс-служба Міністэрства абароны.

“Прайшоў агляд гатоўнасці да выканання задач па прызначэнні, — адзначае ведамства. — Падчас агляду ацэнена гатоўнасць асабовага складу і стан узбраення, вайсковай і спецыяльнай тэхнікі. Падраздзяленні працягваюць падрыхтоўку для далейшага вылучэння ў раёны выканання задач”.

Мінабароны не паведамляе, куды канкрэтна будзе дастаўлена загружаная тэхніка.

Пра пачатак праверкі боегатоўнасці ва Узброеных сілах ваеннае ведамства абвясціла напярэдадні. Было заяўлена, што яна “носіць комплексны характар”. “Асабістаму складу трэба будзе рушыць у вызначаныя раёны, правесці шэраг вучэнняў і трэніровак, у тым ліку з баявой стральбой”, — гаварылася ў паведамленні.

Начальнік Генштаба УС — першы намеснік міністра абароны Віктар Гулевіч заявіў, што “ў існых абвостраных умовах ваенна-палітычнага становішча ва Узброеных сілах надаецца вялікая ўвага падтрыманню высокага ўзроўню баявой і мабілізацыйнай гатоўнасці”.

“Асабліва гэта адметна для цяперашняга часу, калі паблізу нашых межаў праводзяць буйнамаштабныя вучэнні шматнацыянальных сіл НАТО, як на тэрыторыі ўсёй Еўропы, так і паблізу нашых межаў, — сказаў ён. — Гэта і вучэнне “Драгун” з сіламі спецыяльных аперацый на тэрыторыі Польшчы, вучэнне “Трывалы абаронца”, якое аб’ядноўвае ў сабе цэлы шэраг вучэнняў і па маштабах сіл і сродкаў (да 90 тысяч чалавек) з’яўляецца адным з самых буйнамаштабных”.

“Улічваючы існыя ўмовы, ва Узброеных сілах з сённяшняга дня пачынаецца комплексная праверка баявой і мабілізацыйнай гатоўнасці. У рамках аддадзеных баявых распараджэнняў акрэсленыя вайсковыя часці і падраздзяленні будуць выведзеныя ў прызначаныя раёны, дзе з імі будзе праводзіцца шэраг вучэнняў, трэніровак і заняткаў”, — дадаў ён.

Паводле слоў Гулевіча, далей “мерапрыемствы комплекснай праверкі будуць нарошчвацца”, “будзе павялічвацца колькасць сіл і сродкаў для правядзення праверкі”.

Мінабароны рэгулярна праводзіць вучэнні і тактычныя заняткі вайсковых падраздзяленняў на фоне вайны, якую Расія вядзе супраць Украіны. Улады ў Мінску адмаўляюць удзел беларускага войска ў баявых дзеяннях на баку РФ, у той жа час тэрыторыя Беларусі ад пачатку ўварвання, а таксама ў асобныя перыяды пазней актыўна выкарыстоўвалася расійскай арміяй для нанясення ўдараў па Украіне.