Распачатая спецыяльнае вытворчасць у дачыненні да журналіста Хільмановіча і прадпрымальніка Верамеенкі

14 сакавіка, Позірк. Следчае ўпраўленне УСК па Гродзенскай вобласці пачало спецыяльную вытворчасць у дачыненні да Сяргея Верамеенкі і Уладзіміра Хільмановіча, паведамляе прэс-служба Следчага камітэта.

Абодва абвінавачваюцца па ч 1. ч. 2 арт. 361⁴ Крымінальнага кодэкса (садзейнічанне экстрэмісцкай дзейнасці).

Верамеенка — гродзенскі актывіст, былы ўладальнік крамы нацыянальных і палітычных сувеніраў “Адметнасць”. У 2020 годзе адбываў адміністрацыйны арышт за ўдзел у акцыях пратэсту. У яго краме праходзіў ператрус.

Хільмановіч — журналіст, краязнаўца, аўтар “Каляндарнага краязнаўчага даведніка Гродзеншчыны”. 1 снежня мінулага года ў кватэры жонкі Хільмановіча, дзе ён жыў з 2014 па 2021 год, сілавікі правялі ператрус. Канфіскавалі жорсткі дыск камп’ютара, пасведчанне, 25 кніг, музычны дыск, паштовыя маркі, канверты, паштоўкі, буклеты, значкі, газеты.

Спецыяльная вытворчасць у Беларусі ўзбуджалася ў дачыненні да 73 чалавек. Гэта вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, які вядзе крымінальны працэс. Магчымая па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, найміцтва, здрада дзяржаве, дыверсія, стварэнне экстрэмісцкага фарміравання альбо ўдзел у ім, масавыя беспарадкі, заклікі да санкцый і інш.