У мінулыя суткі зафіксавана рэкордная колькасць нелегалаў, якія спрабавалі пранікнуць у ЕС з беларускай тэрыторыі

20 сакавіка, Позірк. У мінулыя суткі, 19 сакавіка, зафіксавана рэкордная з пачатку 2024 года колькасць нелегалаў, якія спрабавалі пранікнуць у Еўрасаюз з беларускай тэрыторыі, — 178. Пра гэта сведчыць праведзены “Позіркам” аналіз статыстычных дадных пагранічных ведамстваў сумежных краін.

У Польшчу спрабавалі пранікнуць 122 мігранты, у Латвію — 37, у Літву — 19.

Папярэдні рэкорд быў зафіксаваны 16 сакавіка — 169 спробаў (у Польшчу — 116, у Латвію — 39, у Літву — 14), да гэтага самым напружаным сёлета днём было 14 сакавіка — 156 спробаў (124, 32 і 0 адпаведна).

15 сакавіка памежныя службы дзяржаў ЕС зафіксавалі 105 спробаў незаконнага перасячэння мяжы (54, 42, 9), 17-га — 157 (78 ,55 — сутачны рэкорд для Латвіі сёлета, 24 — сутачны рэкорд для Літвы сёлета), 18-га — 166 (120, 28, 18).

З пачатку года краіны ЕС спынілі 2.525 спробаў парушэння мяжы з боку Беларусі (Польшча — 1.832, Латвія — 561, Літва — 132), у тым ліку ў сакавіку — 1.971 (1.389, 481, 101).

Колькасць мігрантаў, якія спрабавалі нелегальна перасекчы мяжу з пачатку сакавіка, у 3,6 раза перавысіла сумарны паказчык студзеня і лютага (554).

У 2023 годзе было папярэджана 42.078 спробаў незаконнага перасячэння мяжы з боку Беларусі (Польшча — 25.571, Латвія — 13.863, Літва — 2.644), у 2022-м — 31.892 (Польшча — 15.655, Латвія — 5.026, Літва — 11.211). Агульны рост склаў 31,9% (на польскім напрамку — у 1,6 раза, латвійскім — у 2,8 раза; на літоўскім зафіксавана зніжэнне ў 4,2 раза).

Міграцыйны крызіс на мяжы Беларусі і краін ЕС працягваецца з вясны 2021 года.