СК: У 2023 годзе да пазбаўлення волі прыгаворана 140 непаўналетніх

21 сакавіка, Позірк. У 2023 годзе ў беларускія суды перададзеныя крымінальныя справы ў дачыненні да 727 непаўналетніх грамадзян, асуджаныя 692 чалавекі, з іх да пазбаўлення волі прыгавораныя 140. Такія даныя прывёў на прэс-канферэнцыі 21 сакавіка начальнік аддзела па аналізе практыкі і метадычнага забеспячэння папярэдняга расследавання ўпраўлення Следчага камітэта па Мінску Пётр Мікула.

Пры гэтым, удакладніў ён, на этапе папярэдняга следства пад вартай знаходзілася 107 з 727 непаўналетніх.

Паводле слоў Мікулы, найбольш распаўсюджаным відам злачынстваў, якія здзяйсняюцца непаўналетнімі, з’яўляюцца крадзяжы (46%), далей ідуць хуліганства (20%) і незаконны абарот наркотыкаў (9%).

Начальнік аддзела па наглядзе за выкананнем заканадаўства аб непаўналетніх і моладзі пракуратуры Мінска Міхаіл Мануілаў паведаміў, што ў сталіцы ў 2023 годзе асобамі да 18 гадоў было здзейснена 227 злачынстваў, 98 з іх — у дачыненні да маёмасці (крадзяжы, рабаванні, вымагальніцтва і да т.п.).

У дакладзе вярхоўнага камісара ААН па правах чалавека, прадстаўленым 20 сакавіка, гаворыцца, што па стане на 31 снежня 2023 года 50 непаўналетніх хлопчыкаў і 5 дзяўчынак былі асуджаныя ў рамках крымінальных спраў па палітычна матываваных абвінавачваннях. Пры гэтым, як адзначана ў дакуменце, дзецям, якія не дасягнулі ўзросту крымінальнай адказнасці, прад’яўляліся крымінальныя абвінавачванні, некаторых з іх дапытвалі без прысутнасці адваката або бацькоў, а ў некалькіх выпадках не разглядаліся альтэрнатывы дасудоваму зняволенню і пазбаўленню волі.