На навуковыя канферэнцыі ў Беларусь запрашаюцца ўдзельнікі “СВА”, заявіў начальнік факультэта Генштаба перад адстаўкай
24 сакавіка, Позірк. Факультэт Генеральнага штаба Узброеных сіл Беларусі ў сваёй працы “не можа не ўлічваць досвед апошніх узброеных канфліктаў і лакальных войнаў”, заявіў у эфіры тэлекампаніі Міністэрства абароны “ВаенТВ” начальнік факультэта Ігар Дземідзенка.
“Праводзім ваенна-навуковыя канферэнцыі ў сябе на факультэце, запрашаем непасрэдна ўдзельнікаў “спецыяльнай ваеннай аперацыі” з Узброеных сіл Расійскай Федэрацыі і абменьваемся вопытам”, — сказаў Дземідзенка.
Паводле яго слоў, “вялікую дапамогу” ў навучанні на факультэце аказваюць “структурныя падраздзяленні Міністэрства абароны і Генеральнага штаба”. “Ужо гістарычна так заведзена, што пэўны курс заняткаў з намі праводзяць начальнікі структурных падраздзяленняў, пачынаючы з міністра абароны і начальніка Генштаба. Мы не губляем сувязяў з практыкай”, — адзначыў вайсковец.
Ён таксама паведаміў, што на факультэце навучаюцца “і вайскоўцы іншых дзяржаў”. З часу заснавання “ў нас навучаліся прадстаўнікі Казахстана, Азербайджана, Туркменістана, Кітая”, таму “факультэт апраўдаў сябе і эканамічна, і палітычна і, вядома ж, у ваеннай сферы”, падкрэсліў Дземідзенка.
Інтэрв’ю было запісанае 15 сакавіка, паказана на ютуб-канале тэлекампаніі 24 сакавіка.
21 сакавіка Аляксандр Лукашэнка падпісаў указ аб звальненні генерал-маёра Дземідзенкі з пасады начальніка факультэта Генштаба УС — намесніка начальніка Вайсковай акадэміі. Згодна з дакументам, ён прыкамандзіраваны да Дзяржсакратарыяту Савета бяспекі “з пакіданнем яго ў кадрах Міністэрства абароны”.
Факультэт Генеральнага штаба УС адкрыты ў 2006 годзе на базе Ваеннай акадэміі. Рыхтуе камандзіраў вайсковых злучэнняў і відаў войскаў, кіраўнікоў упраўленняў цэнтральнага апарата Міністэрства абароны і Генштаба.
Тэрмінам “спецыяльная вайсковая аперацыя” расійскія і беларускія ўлады называюць поўнамаштабную вайну супраць Украіны, развязаную РФ у лютым 2022 года.
Афіцыйны Мінск падтрымлівае расійскую агрэсію ва Украіне, на тэрыторыі якой праходзіць найбуйнейшы ваенны канфлікт у Еўропе з часоў Другой сусветнай вайны.
