Першае пасяджэнне Каардынацыйнай рады трэцяга склікання адбудзецца 15 чэрвеня

25 сакавіка, Позірк. Галасаванне па выбарах сябраў Каардынацыйнай рады трэцяга склікання пройдзе з 25 па 28 траўня 2024 года, паведамляе прэс-служба КР.

Чакаецца, што першыя вынікі будуць абвешчаныя не пазней за 29 траўня.

У цяперашні час ідзе фармаванне Выбарчай камісіі (ВК). Цягам сакавіка пройдзе галасаванне КР па яе складзе, гаворыцца ў рэлізе.

Як адзначаецца, да 15 красавіка павінен завяршыцца працэс па фармаванні спісаў выбарчых участкаў і падачы дакументаў на рэгістрацыю ў ВК. Апошняя дата рэгістрацыі кандыдатаў — 22 красавіка.

Агітацыя пройдзе з 25 красавіка па 25 траўня. На падачу і разгляд скаргаў закладзены перыяд з 29 траўня па 8 чэрвеня, у гэты ж дзень будуць абвешчаныя канчатковыя вынікі выбараў.

Першае пасяджэнне Каардынацыйнай рады трэцяга склікання адбудзецца 15 чэрвеня, паведамляе арганізацыя.

19 лютага стала вядома, што дэмакратычныя сілы дамовіліся аб працэдуры выбараў у новы склад КС. “Працоўная група па выбарах [складаная з прадстаўнікоў] офіса Святланы Ціханоўскай, Аб’яднанага пераходнага кабінета і партый, дасягнула кансенсусу”, — гаварылася ў паведамленні.

13 сакавіка Каардынацыйная рада зацвердзіла палажэнне аб выбарах у КР і накіравала яго Ціханоўскай, якая ўзначальвае Аб’яднаны пераходны кабінет.