У гатоўнасць прыведзена брыгада ВПС і СПА, запаснікаў навучаюць тактычнай медыцыне

30 сакавіка, Позірк. У рамках праходкі праверкі ў баявую гатоўнасць прыведзена 120-я зенітна-ракетная брыгада Ваенна-паветраных сіл і войскаў супрацьпаветранай абароны (Баранавічы, Брэсцкая вобласць), вынікае з паведамлення Мінабароны.

“Прызываецца вялікая колькасць ваеннаабавязаных з запасу”, — сказаў намеснік камандуючага ВПС і войскамі СПА па ідэалагічнай рабоце Эдуард Жмакін.

Удакладняецца, што вайскоўцы здзяйсняюць марш у раён выканання задач.

Таксама ў рамках праверкі боегатоўнасці на палігоне Лепельскі (Віцебская вобласць) з ваеннаабавязанымі праводзяцца заняткі па тактычнай медыцыне.

“Ва ўсіх інструктараў добры ўзровень падрыхтоўкі пасля праходжання курсаў у Расійскай Федэрацыі. Усе веды, якія мы выкладаем, будуць карыснымі і ў простым грамадзянскім жыцці”, — заявіў інструктар па тактычнай медыцыне Артур Буката.

Праверка баявой гатоўнасці злучэнняў і воінскіх часцей Беларусі мае “комплексны характар”, яе мерапрыемствы “будуць нарошчвацца”, заявіў 15 сакавіка начальнік Генеральнага штаба Узброеных сіл Віктар Гулевіч.

19 сакавіка Мінабароны паведамляла, што на зборы прызвана да 5 тыс. ваеннаабавязаных.