Рэкорд сакавіцкай тэмпературы ў Беларусі перавышаны больш чым на 4 градусы

Апублікавана на адкрытай версіі “Позірку” 1 красавіка 2024 года ў 19:10

1 красавіка, Позірк. Абноўлены рэкорд сакавіцкай тэмпературы за ўвесь перыяд інструментальных метэаназіранняў у Беларусі, сведчыць праведзенае “Позіркам” параўнанне аператыўных і архіўных даных Белгідрамета за апошні дзень месяца.

На ўсіх метэастанцыях краіны перакрытыя як дзённыя, так і месячныя гістарычныя максімумы.

У Лельчыцах паветра прагрэлася да 27,2 градуса цяпла пры прагнозе сіноптыкаў да 25 градусаў у асобных раёнах. Папярэдні рэкорд месяца — 23,1 градуса — трымаўся з 19 сакавіка 1990 года і быў зафіксаваны там жа.

Больш чым на 5 градусаў перакрытыя рэкорды сакавіка ў Лынтупах (24 супраць 18,8 градуса 19 сакавіка 1990 года) і Магілёве (24,4 супраць 19,3 градуса 25 сакавіка 2014 года).

Найстарэйшы рэкорд перапісаны ў Мар’інай Горцы — 25,3 супраць 20,4 градуса 28 сакавіка 1903 года.

На 25 метэастанцыях, у тым ліку ў Мінску, рэкорды месяца абнаўляліся два дні запар. 30 сакавіка ў сталіцы было 19,9 супраць 18,9 градуса 19 сакавіка 1990 года і 23 сакавіка 2014 года, 31 сакавіка — 24,6.

У дзевяці гарадах дзённыя максімумы 31 сакавіка перавышаныя на 7 і больш градусаў: у Полацку — на 8,6 (24,2 супраць 15,6 у 1999 годзе), Сянно — на 7,7 (23,8 супраць 16,1 у 2019-м), Езярышча — на 7,2 (22,7 супраць 15,5 у 1999-м), Лельчыцах — на 7,1 (27,2 супраць 20,1 у 1983-м), Віцебску — таксама на 7,1 (23,1 супраць 16 у 1968-м), Клічаве — на 7 (25,1 супраць 18,1 у 1983-м), Беразіно — на 7 (24,5 супраць 17,5 у 1983-м), Верхнядзвінску — на 7 (23 супраць 16 у 1999-м).

2 красавіка сіноптыкі прагназуюць паніжэнне тэмпературы, якое пачнецца з заходніх раёнаў. 4 красавіка будзе халадней на 15-20 градусаў, чым цяпер.