Польшча правядзе вучэнні ў рэгіёнах, якія мяжуюць з Беларуссю
Фота: wp.pl.
25 кастрычніка, Позірк. Тактычныя вучэнні ŻUBR-23 правядзе Польшча на тэрыторыі Падляскага, Мазавецкага, Люблінскага і Вармінска-Мазурскага ваяводстваў “на мяжы кастрычніка і лістапада”, паведаміў афіцыйны сайт Узброеных сіл Польшчы.
Мэтай вучэння “з’яўляецца ўмацаванне супрацоўніцтва Войска Польскага з органамі дзяржаўнага кіравання і адпрацоўка правядзення тактычных мерапрыемстваў падраздзяленнямі Ваеннай аператыўнай групы PODLASIE”.
Польскае войска падчас вучэння будуць падтрымліваць паліцыя і пажарная ахова.
Падляскае і Люблінская ваяводствы Польшчы мяжуюць з Беларуссю.
Намеснік дзяржсакратара Савета бяспекі Павел Муравейка 17 верасня заявіў, што Беларусь гатова правесці сумесныя вучэнні з палякамі.
На пасяджэнні Савета бяспекі 31 жніўня Аляксандр Лукашэнка заявіў, што прадстаўнікі Польшчы былі запрошаны назіраць за вучэннямі АДКБ “Баявое брацтва – 2023” (з 1 па 6 верасня). На наступны дзень начальнік дэпартамента міжнароднага ваеннага супрацоўніцтва — памочнік міністра абароны Валерый Равенка паведаміў, што польскі бок “папярэдне” адмовіўся прысутнічаць на вучэннях.
