Генеральнаму сакратару ААН перададзена асабістае пасланне Лукашэнку

9 красавіка, Позірк. Пастаянны прадстаўнік Беларусі пры Арганізацыі Аб’яднаных Нацый Валянцін Рыбакоў сустрэўся 8 красавіка з генеральным сакратаром ААН Антонію Гутэрышам.

Як паведамляе прэс-служба МЗС, “адбыўся абмен думкамі па актуальных пытаннях узаемадзеяння паміж Рэспублікай Беларусь і ААН”.

Падчас сустрэчы генсаку было перададзена асабістае пасланне Аляксандра Лукашэнкі з “падзякай за прызначэнне пастаяннага каардынатара ААН у Беларусі”.

Гутэрыш 28 сакавіка прызначыў на гэтую пасаду прадстаўніка Азербайджана Расула Багірава.

Паводле інфармацыі прэс-службы сусветнай арганізацыі, прызначэнне ўзгоднена з беларускім урадам. Багіраў прыступіў да працы 29 сакавіка.