Лукашэнка разлічвае, што рэгуляванне цэн стане “ўнікальнай аперацыяй у рынкавай, так бы мовіць, эканоміцы”
9 красавіка, Позірк. На нарадзе аб развіцці прамысловасці 9 красавіка Аляксандр Лукашэнка раскрытыкаваў рынкавую мадэль эканомікі, заявіўшы, што Беларусі “гэты рынак падкінулі” канкурэнты, паведамляе яго прэс-служба.
Паводле слоў Лукашэнкі, “прынята лічыць, што рынак усё адрэгулюе”, аднак яго “прэзідэнцкі вопыт кажа пра адваротнае”.
“Вось калі ласка: рынак, свабода, попыт/прапанова ўсё адрэгулююць. Ніколі нідзе на ўсіх этапах майго прэзідэнцкага жыцця нічога рынак не адрэгуляваў. Усюды мы ўмешваліся”, — сказаў ён.
Прывёўшы ў прыклад сістэму дзяржрэгулявання цэн, Лукашэнка заявіў, што не ведае, чым “скончыцца гэтая эпапея”. “Але калі ўрад не праваліць, гэта будзе ўнікальная аперацыя ў рынкавай, так бы мовіць, эканоміцы”, — перакананы ён.
Паводле яго сцвярджэння, калі ўлады заняліся рэгуляваннем коштаў, то Беларусі “адразу сталі прадракаць дэфіцыты і падзенні”.
“Што абвалілася? Якога тавару на прылаўку няма? Усё ёсць. Вытворчасць не працуе — рэагуем. Пройдзе год-паўтара-два, мы гэта ўсё ўрэгулюем, гэта ж усё няпроста. Але гэта самае складанае ў гэтай так званай рынкавай эканоміцы — урэгуляваць цэны па ўсёй краіне, што будуць прыязджаць і вучыцца ў нас. Але нам трэба гэта вытрымаць, нам гэта не даруюць тыя, хто падкідваў свабодны рынак”, — падкрэсліў Лукашэнка.
“Я агітую за тое, што разумна, — дадаў ён. — Не спяшаючыся трэба вярнуцца да канкрэтных вытворчых заданняў, хоць мы ніколі ў вялікім сэнсе слова ад гэтага не сыходзілі. Але дзесьці ўсё гэта закінулі, выкінулі. Таму павінны быць канкрэтныя задачы”.
6 кастрычніка 2022 года па выніках праведзенай у той жа дзень нарады Лукашэнка падпісаў дырэктыву № 10 “Аб недапушчальнасці росту цэн”.
19 кастрычніка ў яе развіццё з’явілася пастанова ўрада № 713 “Аб сістэме рэгулявання цэн”, якая пасля неаднаразова падвяргалася карэктывам.
29 снежня 2023 года была прынятая чацвёртая рэдакцыя дакумента, згодна з якой без узгаднення з дзяржорганамі дазваляецца павышэнне цэн не больш чым на 0,3% штомесяц на кантраляваныя тавары (усяго 331 пазіцыя, 124 ставяцца да харчавання, 207 — да нехарчовых тавараў).
19 студзеня гэтага года кіраўнік Міністэрства антыманапольнага рэгулявання і гандлю Аляксей Багданаў паведаміў, што ведамства “ажыццяўляе рэгуляторыка практычна 85% усіх цэн, якія ёсць на спажывецкім рынку”.
Кіраўнік МАРГ: Увядзенне цэнавага рэгулявання не магло не адбіцца на фінансавым стане гандлю
5 красавіка, Позірк. Увядзенне жорсткага цэнавага рэгулявання "не магло не адбіцца" на фінансавым стане гандлю, у 2023 годзе ў параўнанні з 2022 годам рэнтабельнасць у рознічным гандлі скарацілася, заявіў у інтэрв'ю газеце "Рэспубліка" міністр антыманапольнага рэгулявання і гандлю Аляксей Багданаў. …