За суткі на пажарах загінулі тры чалавекі, з пачатку года — 192

11 красавіка, Позірк. За мінулыя суткі, 10 красавіка, агонь забраў жыцці трох чалавек, паведамляе прэс-служба Міністэрства па надзвычайных сітуацыях.

Усе загінулыя — мужчыны, пражывалі ў сельскай мясцовасці.

У Петрыкаўскім раёне (Гомельская вобласць) у выніку пажару сканаў мужчына 1974 года нараджэння, у Пружанскім (Брэсцкая) — таксама 1974 г.н., у Зэльвенскім (Гродзенская) — 1977 г.н.

Прычыны пажараў і гібелі людзей высвятляюцца.

З пачатку года агонь забраў 192 жыцці (на 16,4% больш, чым за той жа перыяд 2023-га).

За суткі ў Беларусі адбылося 23 пажары, з пачатку года — 1.632 (+10,9%). У 2024 годзе агонь траўмаваў 155 чалавек (+13,1%).

30 студзеня кіраўнік МНС Вадзім Сіняўскі на пасяджэнні калегіі ведамства заявіў, што адзін з галоўных вынікаў дзейнасці Міністэрства па надзвычайных сітуацыях у 2023 годзе — зніжэнне колькасці пажараў і гібелі людзей ад іх.

Паводле яго слоў, “год быў добрым <…> па ўсіх пазіцыях”, дасягненнем ён назваў “станоўчую дынаміку ў частцы скарачэння колькасці надзвычайных сітуацый”, у тым ліку “пажараў, а таксама гібелі людзей ад іх”.

Дзяржсакратар Савета бяспекі Аляксандр Вальфовіч заявіў, што МНС “з усімі пастаўленымі задачамі справілася” і назваў яго калектыў “падрыхтаваным у прафесійным, маральным плане”.

“Гэта дзяржаўныя людзі, якія бачаць перад сабой праблемы, якія трэба вырашаць, і нацэленыя на вырашэнне гэтых праблем”, — дадаў ён.

Заявы аб скарачэнні летась колькасці пажараў прагучалі на фоне іх росту ў 2024-м.