“Экстрэмісцкім фарміраваннем” прызнаны контрпрапагандысцкі праект “Чаго брэшаш?”

11 красавіка, Позірк. Міністэрства ўнутраных спраў 10 красавіка прызнала “экстрэмісцкім фарміраваннем” праект, накіраваны на супрацьдзеянне дзяржаўнай прапагандзе “Чаго брэшаш?”, вынікае з абноўленага пераліку на сайце ведамства.

У “фарміраванне” ўключана “група грамадзян з ліку стваральнікаў, адміністратараў і іншых удзельнікаў” праекта. Рашэнне распаўсюджваецца на аднайменныя акаўнты супольнасці ў “ЦікТоку”, X, “Тэлеграме”, “Інстаграме”, “Фэйсбуку”, “Ютубе” і “Аднакласніках”, да “экстрэмісцкіх” аднесены таксама лагатып “у выглядзе стылістычнага малюнка сабакі, які гаўкае, выкананага ў жоўтым колеры, на чорным фоне”.

У праекта, стваральнікі якога, паводле іх сцвярджэння, “распавядаюць і паказваюць, якія прыёмы маніпуляцыі і дэзінфармацыі выкарыстоўвае прапаганда ў Беларусі”, 4,4 тыс. падпісчыкаў у “Ютубе”, 11 тыс. — у “ЦікТоку”, 534 — у “Інстаграме”, 1.366 — у Х.

У спісе “экстрэмісцкіх фарміраванняў” на сайце МУС 195 пазіцый.