Былы міністр юстыцыі Хаменка аднагалосна абраны намеснікам старшыні Савета Рэспублікі

12 красавіка, Позірк. Былы міністр юстыцыі Сяргей Хаменка аднагалосна абраны намеснікам старшыні Савета Рэспублікі Нацыянальнага сходу (СР НС), паведаміў тэлеграм-канал верхняй палаты парламента.

Былы віцэ-прэм’ер Міхаіл Русы, які ўзначальваў раней камісію па рэгіянальнай палітыцы і мясцовым кіраванні, у новым складзе СР НС будзе кіраваць камісіяй па заканадаўстве і дзяржаўным будаўніцтве. Былы кіраўнік апошняй Сяргей Сівец стаў старшынёй камісіі па міжнародных справах і нацыянальнай бяспецы.

Камісію Савета Рэспублікі па рэгіянальнай палітыцы і мясцовым самакіраванні ўзначаліў былы віцэ-прэм’ер Леанід Заяц, па эканоміцы, бюджэце і фінансах — былы намеснік міністра фінансаў Уладзіслаў Татарыновіч, па адукацыі, навуцы, культуры і сацыяльным развіцці — былы намеснік кіраўніка адміністрацыі Лукашэнкі Ігар Луцкі.

Хаменка і Заяц былі прызначаныя 11 красавіка ў СР НС Аляксандрам Лукашэнкам.

Старшынём Савета Рэспублікі аднагалосна пераабраная Наталля Качанава.