МЗС ФРГ: Улады Беларусі ўсімі сіламі спрабуюць запалохаць і прымусіць замаўчаць журналістаў і СМІ

30 красавіка, Позірк. Улады Беларусі “ўсімі сіламі спрабуюць запалохаць і прымусіць замаўчаць журналістаў і СМІ”, такім чынам Федэральнае міністэрства замежных спраў Германіі адрэагавала на прызнанне 29 красавіка беларускай рэдакцыі нямецкай медыякампаніі Deutsche Welle (DW) “экстрэмісцкім фарміраваннем”.

Гэты факт нямецкае знешнепалітычнае ведамства назвала “яшчэ адным кавалачкам мазаікі ў арсенале рэпрэсій [рэжыму Аляксандра] Лукашэнкі”. “Праўду нельга забараніць”, — падкрэсліла МЗС.

Прэс-сакратар МЗС Себасцьян Фішар на прэс-канферэнцыі ў той жа дзень назваў рашэнне беларускіх уладаў адносна “DW Беларусь” “неабгрунтаваным і няправільным”. Адзначыўшы ў той жа час, што “гаворка ідзе пра пазбаўленне беларускага народа магчымасці атрымліваць незалежную інфармацыю”, прадстаўнік ведамства прызнаў, што гэта “адпавядае дзеянням рэжыму, які вельмі абмежаваў медыйную прастору”. “Мы асудзілі гэта”, — сказаў Фішар.

29 красавіка прызнанне “DW Беларусь” “экстрэмісцкім фарміраваннем” асудзіў гендырэктар DW Петэр Лімбург.

“Абвінавачанні з’яўляюцца няслушнымі і не адпавядаюць рэальнай прыцы нашай беларускай рэдакцыі”, — адзначыў ён. Лімбург лічыць, што гэтае рашэньне дэманструе страх Мінска перад свабоднымі журналістамі.

Міністэрства ўнутраных дзеля 29 красавіка прызнала “экстрэмісцкім фарміраваннем” групу грамадзян “з ліку стваральнікаў, адміністратараў і іншых удзельнікаў інтэрнэт-рэсурсаў пад агульнай назвай “DW Беларусь”, а таксама сайт “UDF — Навіны Беларусі”.

9 сакавіка 2022 года суд Цэнтральнага раёна Мінска прызнаў “экстрэмісцкім” кантэнт інтэрнэт-рэсурсаў DW, лагатып. Сайт гэтага СМІ заблакаваны ў Беларусі з кастрычніка 2021 года.

Deutsche Welle (DW) — міжнародны вяшчальнік Германіі. На сайце медыякампаніі адзначаецца, што яна дае бесстароннія навіны, даючы людзям ва ўсім свеце магчымасць фармаваць уласную думку, ацэньваць пытанні мясцовага і глабальнага значэння і ўдзельнічаць у сацыяльных дыскусіях у якасці актыўных і інфармаваных грамадзян. Стварае матэрыялы на 32 мовах.