У Луцку асуджаны мужчына, які арганізоўваў паездкі на акупаваныя тэрыторыі Украіны праз Беларусь

21 кастрычніка, Позірк. Ураджэнец Днепрапятроўскай вобласці (Украіна) асуджаны ў Луцку за арганізацыю паездак грамадзян на акупаваныя Расіяй тэрыторыі, паведамляе партал vsn.ua.

Маршрут пралягаў праз Польшчу і Беларусь, сярод пунктаў прызначэння быў, у прыватнасці, акупаваны з траўня 2022 года Марыупаль, гаворыцца ў публікацыі.

“Для каардынацыі маршруту і падбору пасажыраў [фігурант справы] выкарыстоўваў мабільны тэлефона і месенджары. За кожнае месца ў транспарце атрымліваў 350–400 еўра”, — паведамляе партал.

Мужчына прызнаны вінаватым “у садзейнічанні парушэнню парадку ўезду на часова акупаваную тэрыторыю Украіны”. Адзначаецца, што ён “прызнаў віну, шчыра раскаяўся і заключыў пагадненне аб прызнанні віны”.

“Суд улічыў яго супрацоўніцтва са следствам, станоўчую характарыстыку, адсутнасць судзімасцяў, інваліднасць II групы і наяўнасць двух непаўналетніх дзяцей”, — адзначае медыя.

Абвінавачаны прыгавораны да трох гадоў пазбаўлення волі з выпрабавальным тэрмінам на два гады.