21 кастрычніка, Позірк. Аб пачатку працы па стварэнні адзінай сістэмы аплаты праезду ў грамадскім транспарце паведаміў на прэс-канферэнцыі ў Мінску 21 кастрычніка начальнік упраўлення аўтамабільнага і гарадскога пасажырскага транспарту Міністэрства транспарту Андрэй Гладкі.
Сістэма ствараецца на базе працэсінгавага цэнтра ДП “Мінсктранс” і будзе ўкаранёная як у Мінску, так і ў рэгіёнах, адзначае прэс-служба ведамства.
Сумесна з прадпрыемствам “Сталічны транспарт і сувязь” распрацоўваецца таксама адзіная сістэма продажу білетаў на аўтаперавозкі пасажыраў рэгулярнымі рэйсамі.
Паведамляецца, што праект прадугледжвае аб’яднанне сістэм браніравання і продажу білетаў у адзіную лічбавую платформу, даступную пасажырам у тым ліку праз мабільныя дадаткі, інтэграцыю электронных сэрвісаў пры міжнародных аўтамабільных перавозках пасажыраў у ДІС (дзяржаўную інфармацыйную сістэму) і інш.
Чакаецца, што адзіная сістэма продажу білетаў пачне працаваць з 1 траўня 2027 года. Яна дазволіць пасажырам “атрымліваць актуальную інфармацыю пра расклад, маршруты і транспартныя сродкі ўсіх аўтаперавозчыкаў рэгулярных зносін, выбіраць аптымальны маршрут паездкі (з прапанаваных маршрутаў), адсочваць рух аўтобусаў, браніраваць месцы, дыстанцыйна набываць білеты і аплачваць праезд (правоз багажу)”, адзначае Мінтранс.
Падрыхтаваны адпаведны праект указа Аляксандра Лукашэнкі, грамадскае абмеркаванне дакумента праходзіла з 8 да 18 верасня паводле ініцыятывы Мінтранса.
Аўтарызавацца
Забыліся пароль?
Выхад з профілю
