Праезд на двух маршрутах грамадскага транспарту Мінска з 6 лістапада можна будзе аплаціць па QR-кодзе

5 лістапада, Позірк. З 6 лістапада 2026 года пасажыры аўтобуса № 1 і тралейбуса № 1 у Мінску змогуць аплачваць праезд па QR-кодзе праз мабільную праграму M-Belarusbank, паведамляе прадпрыемства “Мінсктранс”.

Для аплаты неабходна адсканаваць QR-код, размешчаны ў салоне аўтобуса або тралейбуса, праз раздзел праграмы “Плацяжы” — “Аплата па QR-кодзе” і пацвердзіць аперацыю. Электронны білет пасля гэтага з’явіцца ў раздзеле “Журнал” або “Апошнія плацяжы”. Яго можна прад’явіць кантралёру.

Сэрвіс QR-аплаты ўжо дзейнічае ў грамадскім транспарце шэрагу гарадоў: Гродне, Брэсце, Пінску, Оршы, Лідзе, Мазыры і Баранавічах. Для аплаты праз M-Belarusbank можна выкарыстоўваць зарэгістраваную ў праграме банкаўскую картку, у тым ліку выпушчаную не “Беларусбанкам”.

У сталіцы паралельна тэстуецца іншы спосаб безнаяўнай аплаты — банкаўскімі карткамі праз валідатары. Эксперымент на тралейбусным маршруце № 1 пачаўся 30 верасня 2025 года, на аўтобусным маршруце № 1 — 1 лістапада таго ж года.

24 кастрычніка 2026 года стала вядома, што “Мінсктранс” распрацоўвае гібрыдную сістэму аплаты, якая павінна працаваць як пры наяўнасці інтэрнэту, так і без яго. Для яе ўкаранення спатрэбіцца закупіць дадатковае абсталяванне.

Паўнавартаснае ўкараненне бескантактавай аплаты банкаўскімі карткамі ў наземным грамадскім транспарце Беларусі плануецца да канца 2027 года.

Грамадскае абмеркаванне дакумента праходзіла з 8 да 18 верасня 2025 года з ініцыятывы Мінтранса.

Даведка “Позірку”. У мінскім наземным транспарце, у адрозненне ад метро, павольна асвойваюцца тэхналогіі, якія ўжо даўно ўкаранёныя ў іншых сталіцах. Напрыклад, у Тбілісі праезд можна аплаціць банкаўскай карткай або тэлефонам у любым відзе грамадскага транспарту (метро, аўтобус, маршрутнае таксі), а таксама на адной з цэнтральных канатных дарог. Кошт праезду ў абедзвюх сталіцах у метро аднолькавы (0,39 долара ў эквіваленце), у наземным транспарце беларускай сталіцы крыху таннейшы (0,37). Пры гэтым у Тбілісі, заплаціўшы адзін раз, можна ездзіць 90 хвілін на любым відзе транспарту, тады як у Мінску плата спаганяецца за кожную паездку незалежна ад адлегласці.