21 траўня, Позірк. Для перадачы палітвязням і іх сем’ям у фонды і арганізацыі накіраваныя ўсе 545.740 еўра, сабраныя на марафоне салідарнасці “Нам не ўсё адно!”, паведаміў Аб’яднаны пераходны кабінет (АПК).
На марафоне, які прайшоў у ліпені мінулага года, было сабрана 574.617 еўра. Пасля аплаты камісіі на рахунку засталося 545.740 еўра, у тым ліку 12.000 еўраў у крыптавалюце.
Больш за ўсё — 206.071,63 еўра — накіравана ў фонд салідарнасці BY_help. Грошы для перадачы сем’ям палітвязняў атрымалі фонд салідарнасці BySol (100.000 еўра), дабрачынны фонд “Краіна для жыцця” (60.000), Беларуская асацыяцыя палітвязняў “Да волі”, “Анархічны чорны крыж — Беларусь” (па 40.000), фонд дапамогі беларусам у Літве Razam (28.800), праваабарончая ініцыятыва дапамогі палітвязням Dissidentby (28.000), дабрачынная арганізацыя Littouwin LIONS CLUB (15.000), Беларуская Рада культуры (15.000), медыяпраект дапамогі беларускім палітзняволеным жанчынам “Палітвязынка” і Фонд медыцынскай салідарнасці (па 5.000).
21 лістапада мінулага года АПК паведаміў аб пачатку аўдыту фондаў, якія займаюцца размеркаваннем сабраных на марафоне сродкаў. Гэтую працэдуру, якая праводзіцца назіральнай радай марафону, поўнасцю або часткова прайшлі ўсе згаданыя арганізацыі, за выключэннем Беларускай асацыяцыі палітвязняў “Да волі” і фонду салідарнасці BY_help, у якія перададзена ў агульнай складанасці амаль палова (45,1%) сабраных сродкаў.
У згаданую назіральную раду, паводле інфармацыі АПК, уваходзяць ініцыятар марафону, прадстаўніца кабінета па сацыяльнай палітыцы Вольга Гарбунова, а таксама прадстаўнікі васьмі беларускіх незалежных медыя.
