У вёсцы на мяжы з Украінай правялі эвакуацыйныя вучэнні пры пажары

24 траўня, Позірк. У вёсцы Жмурнае Лельчыцкага раёна Гомельскай вобласці, размешчанай за сем кіламетраў ад мяжы з Украінай, 23 мая правялі камандна-штабныя і тактыка-спецыяльныя вучэнні з эвакуацыйнай камісіяй раёна, паведамляе сайт газеты мясцовага райвыканкама “Светлае жыццё”.

Мэта трэніроўкі, у якой прынялі ўдзел 20 чалавек, — “атрыманне кіруючым складам эвакуацыйных органаў, персаналам сіл Дзяржаўнай службы па надзвычайных сітуацыях навыкаў і ўменняў па выкананні эвакуацыйных мерапрыемстваў”.

Эвакуацыя, паводле вучэнняў, адбывалася з-за ўзнікнення ляснога пажару пры пагрозе яго распаўсюджвання на населены пункт.

Жыхары вёскі адпрацавалі эвакуацыю і часовае размяшчэнне насельніцтва ў гатэлі. Эвакуацыя заняла каля 30 хвілін.

У сувязі з пажаранебяспекай у Лельчыцкім раёне абмежавана наведванне лясоў.

У раёне сёлета адбылося некалькі надзвычайных здарэнняў. Як паведаміла МНС, 14 красавіка ў выніку дажджу і моцнага ветру ў Лельчыцкім раёне зафіксаваны пашкоджанні дахаў сямі будынкаў.

9 студзеня адбыліся адразу два пажары гарэла цаглянай гаспадарчай пабудовы і жылы дом. Пацярпелых не было.

15 лютага ў Лельчыцкім раёне ўводзілі рэжым контртэрарыстычнай аперацыі, які ўлады на той момант патлумачылі “навучэннямі сілавых структур”.

Днём пазней КДБ заявіла аб затрыманні ў прыграніччы ўдзельнікаў “дыверсійна-разведвальнай групы”.