З пачатку 2024 года ў Беларусі адбылося больш за сто лясных пажараў

27 траўня, Позірк. З пачатку сакавіка ў Беларусі адбыліся 102 лясныя пажары на плошчы больш за 106 га, паведамляе 27 траўня прэс-служба Міністэрства лясной гаспадаркі.

Паводле інфармацыі ведамства, большая частка з іх, 48 лясных пажараў, адбылася ў Брэсцкай вобласці. У Віцебскай вобласці за гэты перыяд ліквідаваны два лясныя пажары. У Мінскай і Гомельскай — па 13, у Магілёўскім рэгіёне адбылося 16 пажараў, у Гродзенскім — 10.

Толькі ў сямі раёнах Беларусі 27 траўня адсутнічае забарона на наведванне лясоў. Як сведчыць інтэрактыўная карта Міністэрства па надзвычайных сітуацыях, без абмежаванняў наведваць лясы ў Пастаўскім раёне (Віцебская вобласць), а таксама ў Гродзенскім, Шчучынскім, Мастоўскім, Бераставіцкім, Ваўкавыскім і свіслацкім раёнах Гродзенскай вобласці. Таксама не ўведзены забароны на наведванне лясоў у Мінску. У Пінскім раёне Брэсцкай вобласці ўстаноўлены 5 клас пажаранебяспекі.

Паводле аператыўных даных МНС, за мінулыя суткі ліквідаваны чатыры лясныя пажары на агульнай плошчы 0,343 га і 13 пажараў травы і кустоў на агульнай плошчы 1,158 га.

22 красавіка міністр па надзвычайных сітуацыях Вадзім Сіняўскі заявіў, што колькасць лясных пажараў у 2,5 разы перавысіла леташні ўзровень.

Паводле яго слоў, у 2024 годзе пажаранебяспечная абстаноўка ў першую чаргу “ў лясах і экасістэмах” складваецца дастаткова напружана, аднак “прынятыя меры па маніторынгу сітуацыі, своечасоваму выяўленню ўзгаранняў на ранняй стадыі” дазваляюць “аператыўна іх ліквідаваць”.

“Дзякуючы ў тым ліку выбудаванасці сістэмы мер ва ўзаемадзеянні з Міністэрствам лясной гаспадаркі, аператыўна ўсе [пажары] ліквідуюцца. Лясгасы і іх пажарна-хімічныя станцыі аператыўна рэагуюць з мінімальным прыцягненнем сіл МНС”, — адзначыў міністр.

1 красавіка прэс-служба Міністэрства лясной гаспадаркі паведамляла аб выездзе супрацоўнікаў дзяржаўнай лясной аховы да мяжы з РФ для прыняцця мераў па недапушчэнні “трансгранічнага ляснога пажару”.