31 траўня, Позірк. Лаўрэат Нобелеўскай прэміі па літаратуры 2015 года Святлана Алексіевіч сваёй творчасцю “ўзнесла гісторыі звычайных людзей”, яны сталі “летапісам агульнай гісторыі” народа, адзначыла дэмакратычны лідар Святлана Ціханоўская, віншуючы 31 траўня пісьменніцу з 76-годдзем.
На думку палітыка, Алексіевіч, як і прызнаны палітвязнем лаўрэат Нобелеўскай прэміі міру 2022 года праваабаронца Алесь Бяляцкі, увасабляе дух беларускага народа.
Алексіевіч — першы ляўрэат згаданай прэміі ў гісторыі незалежнай Беларусі. Улетку 2020 года ўвайшла ў прэзідыум першага складу Кардынацыйнай рады. 9 верасня таго ж года ў яе мінскую кватэру спрабавалі трапіць невядомыя. Тады Алексіевіч папрасіла журналістаў дзяжурыць каля яе дома, падтрымаць літаратара прыехалі заходнія дыпламаты. Неўзабаве пасля гэтага пісьменніца з’ехала з краіны. Цяпер жыве ў Германіі.
Праваабаронца Бяляцкі знаходзіцца ў няволі з 14 ліпеня 2021 года. 3 сакавіка 2023-га яго прыгаварылі да 10 гадоў пазбаўлення волі ў рамках палітычна матываванай справы. У снежні 2022 года Нобелеўскую прэмію за яго атрымала жонка Наталля Пінчук, на цырымоніі прысутнічала Ціханоўская.
