У выніку пажару на прадпрыемстве “Нафтан” атрымаў апёкі будаўнік-рамонтнік

11 чэрвеня, Позірк. У выніку пажару на ААТ “Нафтан” у Наваполацку (Віцебская вобласць) пацярпеў адзін чалавек, паведамляе прэс-служба Міністэрства па надзвычайных сітуацыях.

Адзначаецца, што апёкі атрымаў мужчына 1975 года нараджэння — работнік спецыялізаванага рамонтна-будаўнічага ўпраўлення № 3 Наваполацка.

У паведамленні МНС гаворыцца, што ўзгаранне адбылося ў блоку абаротнага водазабеспячэння ў градзірні (прылада для астуджэння вады патокам паветра. — “Позірк”.).

Прычыны інцыдэнту высвятляюцца.

У мінулыя аператыўныя суткі (з 06:00 да 06:00) у Беларусі адбылося 7 пажараў, з пачатку года — 2.665 (на 1,6% менш, чым за той жа перыяд 2023-га). У 2024 годзе агонь траўмаваў 239 чалавек (-9,1%).

З пачатку года ў выніку пажараў загінула 277 чалавек (+11,7%).