11 чэрвеня, Позірк. Адказ Захада на ядзерны шантаж прэзідэнта РФ Уладзіміра Пуціна і Аляксандра Лукашэнкі павінен быць “цвёрдым і рашучым”, заявіла дэмакратычны лідар Святлана Ціханоўская ў сацыяльнай сетцы Х.
Каментуючы другі этап сумесных расійска-беларускіх вучэнняў па ўжыванні нестратэгічнай ядзернай зброі, палітык падкрэсліла: “Іх мэта — запалохаць Захад і аслабіць падтрымку Украіны”.
“Мы павінны прадэманстраваць адваротны вынік — узмацненне падтрымкі свабоднай Беларусі і перамогу Украіны”, — напісала Ціханоўская.
Рэжым Лукашэнкі з’яўляецца “донарам нестабільнасці на межах ЕС і НАТО, пагрозай бяспецы Польшчы, Літвы, Латвіі і Украіны”, у сваю чаргу заявіў у сацсетцы Х намеснік кіраўніка Аб’яднанага пераходнага кабінета, кіраўнік Народнага антыкрызіснага ўпраўлення Павел Латушка.
11 чэрвеня Міністэрства абароны РФ паведаміла пра пачатак другога этапу па ўжыванні нестратэгічнай ядзернай зброі. Напярэдадні аб удзеле беларускіх вайскоўцаў у другім этапе вучэнняў заявіў міністр абароны Віктар Хрэнін.
Аб правядзенні вучэнняў нестратэгічных ядзерных сіл 6 траўня паведаміў Генштаб Мінабароны РФ. На наступны дзень Аляксандр Лукашэнка распарадзіўся правесці ў Беларусі “раптоўную праверку сродкаў — носьбітаў нестратэгічнай ядзернай зброі” з “падачай спецбоепрыпасаў у ракетныя і авіяцыйныя воінскія часці”, загрузкай на пускавыя ўстаноўкі і падвескай на самалёты.
9 траўня было абвешчана, што Пуцін і Лукашэнка дамовіліся “сінхранізавацца” і разам “правесці другі і трэці этап” ядзерных вучэнняў.
