Мінск 23:01

У Польшчы затрыманая беларуска, якая раней не з’явілася ў суд пасля выхаду з-пад арышту

Фота: fakt.pl

20 чэрвеня, Позірк. У Варшаве затрыманая грамадзянка Беларусі Марыя М., якая раней не з’явілася ў суд пасля вызвалення з-пад папярэдняга арышту, паведамляе польскае выданне fakt.pl.

Адзначаецца, што яна “адпраўленая для адбыцця пакінутай часткі прызначанага пакарання”.

На згаданым судовым пасяджэнні планавалася разгледзець яе заяву аб умоўна-датэрміновым вызваленні. Праз няяўку суд пастанавіў узяць беларускую пад варту.

17 чэрвеня стала вядома, што беларуска, якую Люблінскі акруговы суд у ліку 14 замежнікаў 19 снежня 2023 года прыгаварыў да 13 месяцаў пазбаўлення волі за шпіянаж на карысць Расіі, знікла з поля зроку польскіх уладаў пасля выхаду з-пад папярэдняга арышту.

Арышт быў спынены судом, бо яна адбыла большую частку прызначанага тэрміну. Разам з тым ёй было загадана з’явіцца для адбыцця пакінутага тэрміну пазбаўлення волі (каля трох месяцаў).

У рамках справы аб шпіянажы суд абвінаваціў беларуску ў тым, што яна дазволіла выкарыстоўваць свой банкаўскі рахунак для пералічэння грошай за выкананыя членамі завербаванай Расіяй ва Украіне агентурнай сеткі “заданні”, а таксама дапамагала расклейваць антыўкраінскія ўлёткі. Да арышту яна вучылася ў Варшаве.

У абвінаваўчым заключэнні было ўказана, што большасць членаў шпіёнскай сеткі прыбылі ў Польшчу як бежанцы. Усяго ў групе было 13 грамадзян Украіны.

Раней паведамлялася, што лідарам групы быў мужчына, які “аддаваў загады праз месенджар “Тэлеграм”. Гаворка ішла, у прыватнасці, аб маніторынгу крытычна важнай інфраструктуры: міжнароднага аэрапорта Жэшуў-Ясенка, ваенна-марскога порта ў Гдыні, чыгуначнай станцыі ў Жэшуве, памежных пераходаў з Украінай і ключавых чыгуначных шляхоў, па якіх ва Украіну дастаўлялася зброя і гуманітарная дапамога. Лідар групы нібыта планаваў пусціць пад адхон цягнік з вайсковым транспартам, за што прапаноўваў 10 тыс. долараў.

10 траўня міністр унутраных спраў і адміністрацыі Польшчы Томаш Семоняк ініцыяваў стварэнне канстытуцыйнай камісіі па расследаванні ўплыву Беларусі і Расіі.

Падзяліцца:
be