28 чэрвеня, Позірк. У пералік “асоб, датычных да экстрэмісцкай дзейнасці”, 28 чэрвеня дададзена яшчэ 36 чалавек, цяпер у ім 4.190 пазіцый.
Сярод іншых у абноўлены спіс на сайце МУС унесены прызнаны палітвязнем вядомы журналіст Ігар Карней. 22 сакавіка Мінскі гарадскі суд (суддзя Сяргей Кацар) прыгаварыў мужчыну да 3 гадоў пазбаўлення волі паводле ч. 3. арт. 3611 КК (стварэнне экстрэмісцкага фарміравання або ўдзел у ім). Па выніках разгляду апеляцыйнай скаргі 7 чэрвеня ў Вярхоўным судзе (суддзя Аляксандр Саўчук) вырак пакінуты без змен.
У пераліку цяпер таксама фігуруе Вольга Брыцікава, якая некалі была лідарам незалежнага прафсаюза на прадпрыемстве “Нафтан” (Віцебская вобласць). Яна асуджаная паводле арт. 130 КК (распальванне расавай, нацыянальнай, рэлігійнай ці іншай сацыяльнай варожасці ці варажнечы) на падставе рашэння Віцебскага абласнога суда, але інфармацыі пра вырак няма. Згодна з дакументам, жанчына “адбывае пакаранне”.
Фінансавыя аперацыі асоб, уключаных у “спіс экстрэмістаў”, кантралююцца “з мэтай прадухілення легалізацыі даходаў, атрыманых злачынным шляхам, і фінансавання экстрэмісцкай дзейнасці”.
Цягам пяці гадоў пасля выканання судовых рашэнняў людзі з гэтага пераліку не могуць займацца педагагічнай і выдавецкай дзейнасцю, быць на дзяржслужбе, карыстацца зброяй.
