Урад зацвердзіў пералік відаў дзейнасці для ІП і самазанятых

1 ліпеня, Позірк. Савет міністраў вызначыў пералік відаў дзейнасці, дазволеных для ажыццяўлення ў якасці індывідуальных прадпрымальнікаў і самазанятых, паведамляе тэлеграм-канал урада.

Падкрэсліваецца, што адпаведная пастанова ўступае ў сілу з 1 кастрычніка 2024 года.

Пры гэтым спісы дазволеных відаў дзейнасці для ІП і самазанятых не апублікаваныя. Анансуецца публікацыя дакумента на сайце Нацыянальнага цэнтра заканадаўства і прававой інфармацыі.

“З гэтага моманту дзяржаўная рэгістрацыя ІП па відах эканамічнай дзейнасці, не ўключаных у пералік урада, ажыццяўляцца не будзе”, — гаворыцца ў паведамленні ўрада.

Удакладняецца, што для дзейных ІП, “віды эканамічнай дзейнасці якіх не ўвайшлі ў пералік, прадугледжаны пераходны перыяд (да 31 снежня 2025 года) для перарэгістрацыі ў камерцыйную арганізацыю ў спрошчаным парадку ў адпаведнасці з заканадаўствам”.

15 траўня паведамлялася аб вынясенні на грамадскае абмеркаванне праекта пастановы Савета міністраў “Аб прадпрымальніцкай дзейнасці”.

Дакумент падрыхтаваны Міністэрствам эканомікі і зацвярджае палажэнне “аб парадку фарміравання і вядзення рэестра суб’ектаў малога і сярэдняга прадпрымальніцтва”. Ён вызначае пералік відаў дзейнасці, дазволеных для ажыццяўлення “ў якасці індывідуальнага прадпрымальніка”, “у якасці самастойнай прафесійнай дзейнасці”, а таксама пералік відаў рамеснай дзейнасці.

Сярод іншага з праекта пастановы вынікае, што індывідуальныя прадпрымальнікі не змогуць ажыццяўляць аптовы гандаль, займацца медыцынскай практыкай, у тым ліку стаматалагічнай. Ім дазваляецца весці раздробны гандаль “іншымі транспартнымі сродкамі”, але не аўтамабілямі і матацыкламі.

Дакументам прапанавана ўстанавіць 81 від самастойнай прафесійнай дзейнасці, да якой могуць быць аднесеныя рэпетытарства, распрацоўка сайтаў, цырульні, касметычныя паслугі, паслугі па манікюры і педыкюры, продаж самастойна вырашчаных кветак, дэкаратыўных раслін, насення і расады, жывёл (акрамя кацянят і шчанюкоў), вырабленых хлебабулачных і кандытарскіх вырабаў, гатовай кулінарнай прадукцыі.

Да пералікаў рамеснай дзейнасці дакумент адносіць кавальскую справу, выраб пражы, мастацкую апрацоўку і роспіс вырабаў заказчыка (з дрэва, каменя, косці, рогі, металу, бляхі, шкла, керамікі, фанеры), выраб і рамонт цэлага шэрагу прадметаў — ад печкавых кафляў да нацыянальных музычных інструментаў.

Мінэканомікі ў фінансава-эканамічным абгрунтаванні таго, чаму неабходна прыняць гэтую пастанову, не прыводзіць ніякіх лічбаў. Ведамства не паведамляе, як зменяцца даходы рэспубліканскага і мясцовых бюджэтаў, у дакуменце “не вызначана” змяненне велічыні даходаў бюджэту дзяржаўнага пазабюджэтнага фонду сацыяльнай абароны насельніцтва і інш.

Адзначаецца, што прапанаваныя для фізічных асоб віды дзейнасці “могуць пацягнуць неабходнасць для часткі грамадзян выбіраць іншую форму для рэалізацыі прадпрымальніцкай ініцыятывы альбо адмовіцца ад вядзення сваёй справы з пераходам у статус наёмнага работніка”.

Мінэканомікі прызнала, што “вызначыць кола асоб, у якіх могуць сфарміравацца пэўныя адміністрацыйныя выдаткі” ў сувязі з нормамі пастановы, а таксама “аб’ём такіх выдаткаў не ўяўляецца магчымым”.

22 красавіка Аляксандр Лукашэнка падпісаў закон па пытаннях прадпрымальніцкай дзейнасці. Дакумент устанаўлівае “абноўленую архітэктуру прадпрымальніцтва”, якая прадугледжвае “дзве катэгорыі, якія займаюцца прадпрымальніцкай дзейнасцю: юрыдычныя і фізічныя асобы”.

Да юрыдычных асоб аднесеныя малыя арганізацыі з колькасцю працуючых да 100 чалавек, сярэднія — да 250 і буйныя — звыш 250, да фізічных асоб — рамеснікі, уладальнікі аграэкасядзіб, самазанятыя, індывідуальныя прадпрымальнікі.

Віды дзейнасці, якія змогуць ажыццяўляць індывідуальныя прадпрымальнікі, урад быў павінен вызначыць да 1 ліпеня. Па відах дзейнасці, якія не ўвойдуць у плануемы пералік, з 1 кастрычніка спыняецца рэгістрацыя новых індывідуальных прадпрымальнікаў.

Таксама ўстанаўліваецца абавязак пераходу да 1 студзеня 2026 года дзеючых індывідуальных прадпрымальнікаў у юрыдычныя асобы.

Міністр эканомікі Юрый Чабатар, каментуючы закон, назваў галоўнай мэтай дакумента стварэнне дадатковыя стымулаў для таго, каб малы бізнес “узбуйняўся”.

Кіраўнік ведамства назваў тры перавагі новага закона: магчымасць перарэгістрацыі ІП у юрыдычную асобу за адзін дзень, захаванне для такіх юрыдычных асоб спрошчанага адміністравання і дадатковыя меры фінансавай падтрымкі малога бізнесу. Чыноўнік пакінуў без каментара негатыўныя бакі новага дакумента.