Праваабаронцы прызналі палітвязнямі яшчэ 8 чалавек

3 ліпеня, Позірк. Беларуская праваабарончая супольнасць прызнала палітычнымі зняволенымі яшчэ 8 чалавек, вынікае з сумеснай заявы, апублікаванай на сайце цэнтра “Вясна”.

Адпаведны статус атрымалі ўзятыя пад варту паводле арт. 361⁴ Крымінальнага кодэкса — Надзея Лескавец, Ірына Пагадаева, Глеб Дудко, Ілля Гумбар; паводле арт. 361² — Ірына Клязовіч; паводле арт. 361¹ і ч. 2 арт. 361³ — Жанна Дашкевіч; за “падтрымку экстрэмісцкай дзейнасці” пасля звязанай з дапамогай палітвязням хвалі затрыманняў — Марына Гацура; асуджаны паводле ч. 2. арт. 361³ Віктар Нікіфараў (5 гадоў пазбаўлення волі).

Праваабаронцы падкрэслілі, што ў 2021 годзе крымінальнае заканадаўства было “істотна пастрожана і дапоўнена новымі складамі злачынстваў”, якія выкарыстоўваюцца “выключна ў мэтах палітычных рэпрэсій”.

“МУС і КДБ у пазасудовым парадку адвольна прызнаюць экстрэмісцкімі групы грамадзян, аб’яднаных грамадскімі ці палітычнымі інтарэсамі, якія крытыкуюць дзеянні ўладаў і патрабуюць змен у дзяржаве і палітыцы, якую яна праводзіць, таксама экстрэмісцкімі фарміраваннямі прызнаныя некаторыя СМІ, — гаворыцца ў заяве. — Гэта ў сваю чаргу адкрывае шлях да адвольнага прыцягнення да крымінальнай адказнасці і пазбаўлення волі іх удзельнікаў і рэспандэнтаў у якасці непрапарцыйнай меры абмежавання права на асацыяцыю і свабоды выказвання меркаванняў”.

Аўтары дакумента заклікалі ўлады неадкладна вызваліць усіх палітвязняў і спыніць рэпрэсіі ў краіне.

Апрача “Вясны” заяву падпісалі Беларускі ПЭН і Lawtrend.

На вечар 3 ліпеня ў Беларусі 1.415 чалавек, якіх праваабаронцы прызнаюць палітвязнямі. У рэальнасці грамадзян, якія зазналі рэпрэсіі ў той ці іншай форме, значна больш.

Даведка “Позірку”:

• арт. 361¹ КК — стварэнне экстрэмісцкага фарміравання або ўдзел у ім;
• арт. 361² КК — фінансаванне экстрэмісцкай дзейнасці;
• ч. 2 арт. 361³ КК — вярбоўка, навучанне, іншая падрыхтоўка або выкарыстанне грамадзян Беларусі для ўдзелу на тэрыторыі замежнай дзяржавы ва ўзброеным фарміраванні аднаго з супрацьлеглых бакоў, ва ўзброеных канфліктах, ваенных дзеяннях, а таксама фінансаванне або іншае матэрыяльнае забеспячэнне такой дзейнасці;
• ст. 361⁴ КК — садзейнічанне экстрэмісцкай дзейнасці.