“Белсат” увойдзе ў склад новай польскай медыяструктуры

4 ліпеня, Позірк. Тэлеканал “Белсат” увойдзе ў склад медыяструктуры, якая ствараецца на базе Польскага грамадскага вяшчання (TVP), паведамляе gazetaprawna.pl.

Адзначаецца, што структура будзе называцца Цэнтрам замежных праграм (ЦЗП) і аб’яднае ўсе тэлеканалы, якія вяшчаюць на замежных мовах.

Паводле слоў кіраўніка TVP World Міхала Бранятоўскага, асноўная праца па ўшанаванні ЦЗП ўжо праведзеная, цяпер распрацоўваецца яго рэгламент і структура.

Мяркуецца, што ў склад ЦЗП, акрамя “Белсата”, увойдуць расійскі канал “Вось Так” і “ўкраінская рэдакцыя”, якая пачне працаваць з 1 сакавіка 2025 года. Кіраваць ЦЗП будзе TVP World.

“Ліквідацыі “Белсату” не будзе, будзе новая структура. Хачу падкрэсліць — “Белсат” не знікае, ён толькі набывае новыя магчымасці, — адзначыў Бранітоўскі. — Кожнае тэлебачанне ўнутры групы будзе працаваць пад сваім сцягам, у іх будзе свой бюджэт і аўтаномія”.

“Іншамоўныя тэлеканалы атрымалі новыя абавязацельствы, якіх патрабуе цяперашняя сусветная сітуацыя. Мы цэнім дасягненні “Белсата” ў барацьбе за незалежнасць Беларусі, але важная і расійскамоўная інфармацыя, якая дойдзе да былых савецкіх рэспублік, дзе масы людзей гавораць па-руску”, — заявіў у сваю чаргу прэс-сакратар МЗС Польшчы Павел Вронскі.

У публікацыі wirtualnemedia.pl гаворыцца, што ЦЗП пачне працу 1 сакавіка 2025 года.

Выданне паведамляе, што ў “Белсаце” цяпер працуе 320 супрацоўнікаў. Сцвярджаецца, што большасць з іх захаваюць працоўныя месцы, а кіраваць беларускай рэдакцыяй будзе Аляксей Дзікавіцкі.

12 сакавіка дырэктар “Белсату” Агнешка Рамашэўска-Гузы, якая кіравала каналам з 2007 года, паведаміла пра сваё звальненне. У той жа дзень стала вядома, што на чале канала стане Дзікавіцкі, які да гэтага займаў пасаду намесніка дырэктара.

Прэс-служба TVP удакладніла тады, што змены сталі “вынікам працы над новай мадэллю для замежных каналаў TVP”, што фінансуюцца польскім Міністэрствам замежных спраў.

3 красавіка Рамашэўска-Гузы звярнулася ў суд з пазовам у дачыненні да TVP. “Не павінна быць так, што пасля 32 гадоў працы чалавека выкідваюць, як смецце”, — напісала яна на сваёй старонцы ў “Фэйсбуку”.

У 2023 годзе “Белсат”, асноўнай крыніцай фінансавання якога з’яўляюцца сродкі ад МЗС Польшчы, атрымаў ад ведамства 63 млн злотых (каля 15,8 млн долараў на сёння), паведаміў на прэс-канферэнцыі 20 сакавіка Дзікавіцкі. На гэты год, паводле яго слоў, гэтая сума скарочаная да 40 млн (крыху больш за 10 млн). Такім чынам, фінансаванне скарочанае на 36,5%.

Пасля прыходу да ўлады па выніках парламенцкіх выбараў, якія адбыліся ў кастрычніку 2023 года, урад новага прэм’ер-міністра Дональда Туска пачаў рэвізію грамадскіх і дзяржаўных СМІ, якія, на яго думку, адстойвалі інтарэсы толькі кіруючай да гэтага партыі-канкурэнта “Права і справядлівасць”.

Тэлеканал “Белсат” створаны для вяшчання на Беларусь у 2007 годзе на падставе дамовы паміж МЗС Польшчы і TVP.