У чэрвені МАРГ выявіў парушэнні пры дзяржзакупках у будаўніцтве на 36,1 млн рублёў

11 ліпеня, Позірк. У чэрвені Міністэрства антыманапольнага рэгулявання і гандлю (МАРГ) прадухіліла працэдуры дзяржаўных закупак у сферы будаўніцтва на суму больш за 36,1 млн рублёў, паведамляе прэс-служба ведамства.

Адзначаецца, што падчас выбарачнага маніторынгу было ўстаноўлена, што гэтыя дзяржзакупкі былі арганізаваныя з парушэннем заканадаўства.

Асноўнымі парушэннямі МАРГ называе “неправамернае ўстанаўленне” патрабаванняў да ўдзельнікаў працэдур, а таксама неналежнае выкарыстанне “ўмоў прымянення прэферэнцыйнай папраўкі да тавараў (работ, паслуг), крытэрыяў ацэнкі і параўнання прапаноў”.

Заяўляецца, што заказчыкам працэдур дзяржзакупак вынесеныя “рэкамендацыі па ліквідацыі выяўленых парушэнняў”, якія ўжо “цалкам выкананыя”.

Падрабязнасці не паведамляюцца.

У красавіку аналагічны маніторынг МАРГ выявіў у сферы будаўніцтва парушэнні пры правядзенні пяці працэдур дзяржзакупак на агульную суму каля 494 млн рублёў.

На выніковай калегіі Генеральнай пракуратуры, якая прайшла 20 лютага гэтага года пад старшынствам кіраўніка ведамства Андрэя Шведа, паведамлялася, што ў 2023 годзе ў сферы дзяржзакупак органы пракуратуры правялі 426 праверак, па выніках якіх адмененыя 152 працэдуры на суму звыш 11 млн рублёў. Узбуджана 29 крымінальных спраў.