Колькасць наведванняў Грузіі грамадзянамі Беларусі зменшылася на 2% у гадавым вымярэнні

11 ліпеня, Позірк. У першым паўгоддзі 2024 года грамадзяне Беларусі 43.668 разоў наведалі Грузію — на 2% менш, чым за аналагічны перыяд 2023-га, сведчаць даныя Нацыянальнай адміністрацыі турызму (НАТ) гэтай краіны.

Усяго за шэсць месяцаў замежнікі 3 млн разоў наведвалі Грузію.

Больш за ўсё візітаў нанеслі грамадзяне Турцыі — 623.972 тыс. (+7,1%), Расіі — 527.519 тыс. (-8,7%), Арменіі — 387.691 (-2,4%), Ізраіля — 126.213 (+18,5%) і Азербайджана — 99.472 (+16%).

Грамадзяне Беларусі па колькасці візітаў у Грузію занялі дзясятае месца — наперадзе таксама вандроўцы з Казахстана, Ірана, Індыі і Украіны.

Значны рост прадэманстравалі грамадзяне Кітая — 32.853 паездак (+159,5%) і Саудаўскай Аравіі — 22.271 (+44,3%).

З 1 студзеня 2026 года ў Грузіі ўступіць у сілу патрабаванне аб абавязковым медыцынскім страхаванні і страхаванні ад няшчасных выпадкаў для турыстаў.

Па ініцыятыве НАТ створаная міжведамасная камісія для вызначэння правілаў і ўмоў такога страхавання.

Як паведамлялася раней, планавалася, што ўрад гэтай краіны распрацуе і зацвердзіць асобнай пастановай сістэму страхавання замежнікаў, аднак гэтага дагэтуль не адбылося, абмеркаванне працягваецца, паведамілі “Позірку” прадстаўнікі двух грузінскіх страхавых кампаній.

16 траўня шэрагам інтэрнэт-рэсурсаў была распаўсюджаная інфармацыя аб неабходнасці з 1 чэрвеня мець страхоўку пры ўездзе ў Грузію. Як высветлілася, яна не адпавядае рэчаіснасці.

Раней шэраг СМІ паведаміў, што з 1 чэрвеня пры ўездзе ў Грузію неабходна мець поліс, які пакрывае выдаткі на экстранныя амбулаторныя паслугі ў памеры 5 тыс. долараў альбо еўра, на паслугі стацыянараў — у памеры 30 тыс. долараў альбо еўра. Адсутнасць страхоўкі цягне штраф у памеры 300 лары (каля 100 еўра), сума павышаецца ўдвая, калі штраф не аплочаны ва ўстаноўлены тэрмін, і ўтрая — калі ён не аплочаны на працягу месяца пасля ўстаноўленага тэрміну.

Першакрыніцай інфармацыі быў тэлеграм-канал Асацыяцыі тураператараў Расіі.

Грузія стала адной з краін, куды выязджаюць беларусы, якія ратуюцца ад рэпрэсій. Там можна знаходзіцца 364 дні ў годзе, віза не патрэбная. Паводле даных НАТ, у студзені — сакавіку 2024 года Грузію наведала 17.236 грамадзян Беларусі — на 6,3% менш, чым у першым квартале 2023-га (18.400).

На пачатку 2024 года стала вядома, што за мінулы год колькасць грамадзян Беларусі, якія знаходзяцца ў Грузіі, зменшылася на 1.999, або на 15% (на 1 студзеня 2023-га ў Грузіі пражываў 13.361 беларускі грамадзянін).

На пачатак мінулага года беларусы з’яўляліся трэцяй па колькасці замежнай групай у Грузіі пасля расіян (62.304) і ўкраінцаў (20.716).

У першым квартале 2024 года дзевяць грамадзян Беларусі папрасілі ў Грузіі прытулку.