Праз стан вады санслужба абмежавала купанне на 28 пляжах

12 ліпеня, Позірк. На гэтым тыдні санслужба абмежавала купанне на 28 пляжах праз стан вады, вынікае з паведамлення прэс-службы Міністэрства аховы здароўя.

Адмыслоўцы абследавалі 364 зоны рэкрэацыі. Праведзена даследаванне 939 пробаў вады, з якіх 41 (4,37%) не адпавядала гігіенічным нарматывам.

Па выніках праведзенай працы было вырашана прыпыніць, абмежаваць ці забараніць купанне ў пэўных месцах.

У Брэсцкай вобласці абмежаванні закранулі пляжы на рацэ Ведзьма ў Ляхавічах і вадаёме лагера “Чайка” ў вёсцы Галавінцы; Віцебскай — асобныя пляжы ў Полацку і Наваполацку; Гомельскай — некаторыя пляжы ў Гомелі, Рэчыцы, Жлобіне, Рагачове, пляжы на Бярэзіне і вадасховішчы ў Светлагорску, у трох зонах рэкрэацыі на рацэ Сож у Гомельскім раёне.

У Гродзенскай вобласці нельга купацца ў сажалцы гарадскога пасёлка Вялікая Бераставіца, у Гродне — на пляжы лесапарку “Урочышча Ласосна” на Нёмане.

У Магілёўскай вобласці сярод іншых месцаў пад абмежаванні трапілі гарадскі пляж на Дняпры і зона ў сажалкі Броды, што месцяцца ў Магілёве. На Дняпры таксама нельга купацца ў раёне лядовай арэны ў Шклове, пляжаў аграгарадка Палыкавічы і гарадскога пасёлка Дрыбін.

У вадаёмах Беларусі практычна штодзень тонуць дзеці і дарослыя, часта ў месцах, не прызначаных для купання. Медыкі папярэджваюць, што купанне там небяспечнае.

Міністэрства па надзвычайных сітуацыях папярэджвае, што купацца трэба толькі ў цвярозым стане, у адмыслова адведзеных месцах, адпачываць трэба на абсталяваных пляжах. Рэкамендуецца не плаваць у адзіноце, каля блізка ідучых судоў. Нельга заплываць за буйкі і іншыя агароджы, выпускаць з-пад увагі дзяцей.