З-за залевы ў Мінску паралізаваная праца больш як 40 маршрутаў грамадскага транспарту (абноўлена)
Паводка ў раёне парка Чалюскінцаў
18 ліпеня, Позірк. Лівень, які абрынуўся на Мінск раніцай 18 ліпеня, паралізаваў працу больш чым 40 маршрутаў грамадскага транспарту, сведчыць праведзены “Позіркам” аналіз экстраных паведамленняў аб дарожнай абстаноўцы, якія распаўсюджваюцца прадпрыемствам “Мінсктранс”.
Парушаны рух 24 тралейбусных, 16 аўтобусных і 6 трамвайных маршрутаў. Вада затапіла розныя ўчасткі амаль 30 вуліц і праспектаў, у тым ліку Незалежнасці і Пераможцаў. У асноўным непагадзь закранула паўночную палову горада і цэнтр.
Дынаміка радарнай карты сведчыць, што ў бліжэйшы час моцны дождж не спыніцца.
На 18 ліпеня Белгідрамет прагназаваў у Мінску кароткачасовы дождж з верагоднасцю 70-80% (кароткачасовым лічыцца дождж працягласцю да трох гадзін), штармавое папярэджанне не выпускалася.
Абнаўленне ў 12:15: Сталічны метрапалітэн у 12:07 паведаміў, што з-за залевы зачыненая станцыя першай лініі “Парк Чалюскінцаў”.
