Лукашэнка заявіў, што генеральны сакратар ААН не прад’яўляў яму прэтэнзій на сустрэчы ў Астане

18 ліпеня, Позірк. На сустрэчы з пастаянным прадстаўніком Беларусі ў Арганізацыі Аб’яднаных Нацый Валянцінам Рыбаковым Аляксандр Лукашэнка паспрабаваў абвергнуць інфармацыю аб прэтэнзіях на свой адрас з боку генеральнага сакратара ААН Антоніу Гутэрыша падчас перамоў 4 ліпеня ў Астане (Казахстан) на палях саміту ШАС.

“Мы сустракаліся з Антоніу Гутэрышам. Адбылася такая цікавая размова, цікавая сустрэча. Інтэрпрэтавалі яе па-рознаму некаторыя СМІ, асабліва ў інтэрнэце. Тыпу таго, што там прэтэнзіі нейкія Гутэрыш прад’явіў нам. Добра разумееш, седзячы і знаходзячыся там, у Нью-Ёрку, [што] ніякіх прэтэнзій да нас прад’яўлена не было. Наадварот, станоўчую атрымалі мы ацэнку”, — заявіў Лукашэнка, звяртаючыся да Рыбакова.

Паводле слоў Лукашэнкі, якія перадае яго прэс-служба, Беларусь як адна з краін — заснавальніц ААН “падтрымлівала і будзе падтрымліваць” арганізацыю і працягне “працаваць над тым, каб ААН была больш эфектыўнай”.

На афіцыйным сайце ААН 4 ліпеня паведамлялася, што падчас праведзенай у той жа дзень сустрэчы з Лукашэнкам Гутэрыш выказаў занепакоенасць сітуацыяй з правамі чалавека ў Беларусі. Ён выказаў пажаданне, каб амністыя, у выніку якой было вызвалена некалькі палітвязняў, стала “крокам да поўнай павагі правоў чалавека і асноўных свабод у Беларусі”.

Генеральны сакратар падкрэсліў важнасць спынення вайны на Украіне на аснове Статута ААН, міжнароднага права і павагі тэрытарыяльнай цэласнасці дзяржаў.

Прэс-служба Лукашэнкі падрабязнасці сустрэчы не прыводзіла.

У новай справаздачы спэцыяльнага дакладчыка ААН па правах чалавека ў Беларусі Анаіс Марэн, апублікаванай у чэрвені, гаворыцца, што сітуацыя ў галіне правоў чалавека ў Беларусі працягвае пагаршацца, палітычныя рэпрэсіі накіраваныя супраць грамадзян не толькі ўнутры краіны, але і за яе межамі.

8 красавіка Рыбакоў сустрэўся з Гутэрышам. Генсеку было перададзенае асабістае пасланне Лукашэнкі з “падзякай за прызначэнне пастаяннага каардынатара ААН у Беларусі”.

Гутэрыш 28 сакавіка прызначыў на гэтую пасаду прадстаўніка Азербайджана Расула Багірава.

У сакавіку ўмяшацца ў сітуацыю з палітвязнямі ў Беларусі заклікала Гутэрыша дэмакратычны лідар Святлана Ціханоўская. Заклік прагучаў каля амбасады Беларусі ў Вільнюсе на сустрэчы з журналістамі, прысвечанай рэжыму “інкамунікада”, у якім улады ў Мінску ўтрымліваюць многіх палітвязняў.

У лютым Камітэт ААН па правах чалавека (КПЧ) запатрабаваў ад беларускіх уладаў прыняць “тэрміновыя меры абароны” ў дачыненні да палітвязняў Сяргея Ціханоўскага, Максіма Знака і Віктара Бабарыкі, якія “ўтрымліваюцца без сувязі са знешнім светам”. Камітэт таксама запатрабаваў “забяспечыць фізічнае і псіхічнае здароўе” Ціханоўскага, даць яму доступ да кваліфікаванай медыцынскай дапамогі, адвакатаў і сям’і, пакуль справа знаходзіцца на разглядзе КПЧ.