Ціханоўская: Мы будзем працаваць з любым прэзідэнтам ЗША

Апублікавана на адкрытай версіі “Позірку” 23 ліпеня 2024 года ў 20:05

23 ліпеня, Позірк. “Мы будзем працаваць з любым прэзідэнтам ЗША, а хто ім стане — гэта ўжо вырашыць амерыканскі народ”, — заявіла “Позірку” беларускі дэмакратычны лідар Святлана Ціханоўская.

Яна выказала ўпэўненасць, што палітыка ЗША ў дачыненні да Беларусі і Украіны “застанецца нязменнай, будзе рашучай і паслядоўнай”.

Ціханоўская станоўча адказала на пытанне, ці мае яе каманда кантакты з асяроддзем віцэ-презідэнта Камалы Харыс, якая мае намер пайсці на выбары (адбудуцца 5 лістапада) ад Дэмакратычнай партыі замест дзейнага прэзідэнта Джо Байдэна, і Дональда Трампа, кандыдата ад Рэспубліканскай партыі, прэзідэнта ў 2017—2021 гадах.

“Нядаўна я сустракалася з дарадцам віцэ-прэзідэнта па нацыянальнай бяспецы”, — адзначыла дэмлідар.

Паводле яе слоў, беларускае пытанне аб’ядноўвае абедзьве найбуйнейшыя амерыканскія партыі. “Падчас кожнага візіту ў ЗША я сустракаюся і з дэмакратамі, і з рэспубліканцамі”, — сказала Ціханоўская.

Гл. таксама па тэме:

Ціханоўская падзякавала Байдэну за “непахісную падтрымку” Беларусі