Расія вярнула ў Беларусь 600 кг буякоў

24 ліпеня, Позірк. Буйную партыю свежых буякоў, якая транспартавалася ў Санкт-Пецярбург, вярнулі ў Беларусь на падставе рашэння інспектара Паўночна-Заходняга міжрэгіянальнага ўпраўлення Федэральнай службы па ветэрынарным і фітасанітарным наглядзе Расіі (Рассельгаснагляд), вынікае з паведамлення на сайце ведамства.

600 кг ягад везлі праз фітасанітарны кантрольны пункт Далосцы (Себежскі раён Пскоўскай вобласці РФ). Пункт знаходзіцца ля мяжы з Расонскім раёнам Віцебскай вобласці.

“У фітасанітарным сертыфікаце на перавозную падкаранцінную прадукцыю адсутнічаюць звесткі пра выкананне адзіных каранцінных фітасанітарных патрабаванняў: не была пазначаная інфармацыя пра каранцінныя аб’екты, ад якіх павінна быць свабодная прадукцыя”, — заявіў расійскі кантрольны орган.

15 ліпеня Рассельгаснагляд паведаміў пра выяўленне “факта кантрабанды нарвежскай рыбнай прадукцыі праз Беларусь у Расію”.

Ведамства заявіла, што ў чэрвені 2024 года на аўтадарозе М1 Масква — Мінск быў спынены “транспартны сродак, які перавозіў рыбную прадукцыю сумнеўнага паходжання”. “У выніку кантрольных мерапрыемстваў выяўленыя парушэнні ў маркіроўцы тавару, таксама маюцца абгрунтаваныя сумневы ў сапраўднасці прадстаўленых ветэрынарных суправаджальных дакументаў”, — адзначыў Рассельгаснагляд.

“Маюцца прыкметы, якія сведчаць, што прадукцыя, магчыма, вырабленая ў Нарвегіі, прамаркіраваная на тэрыторыі Рэспублікі Беларусь і пад выглядам расійскай рыбнай прадукцыі, як мяркуецца, кантрабандным спосабам увезена на тэрыторыю Расіі”, — паведаміла ведамства.

У чэрвені ўпраўленне Рассельгаснагляду па Бранскай, Калужскай і Смаленскай абласцях вярнула ў Беларусь 5,4 тыс. харчовых курыных яек, якія везлі без дакументаў у “бруднай машыне”.