Мінпрацы: З 1 жніўня памеры дапамогі па догляду дзіцяці ва ўзросце да трох гадоў павялічацца на 7,3%

24 ліпеня, Позірк. З 1 жніўня памеры дапамогі па доглядзе дзіцяці ва ўзросце да трох гадоў будуць павялічаны на 7,3%, паведамляе Міністэрства працы і сацыяльнай абароны.

Гэты паказчык разлічаны зыходзячы з сярэднямесячнай заработнай платы (СЗП) за другі квартал 2024 года.

Дапамога складзе: на першае дзіця (35% СЗП) — 777,81 рублёў (вырасце на 52,96 рубля); на другога і наступных дзяцей (40% СЗП) — 888,92 рублёў (60,52); на дзіця-інваліда (45% СЗП) — 1.000,04 рубля (68,09).

У гэтых памерах дапамога па доглядзе дзіцяці да трох гадоў будзе дзейнічаць па 31 студзеня 2025 года, падкрэслілі ў ведамстве.

Паводле даных Белстата, намінальная налічаная сярэдняя заработная плата работнікаў Беларусі ў чэрвені 2024 года склала 2.270 рублёў — на 50,8 рубля больш (+2,29%), чым у траўні (2.219,2).

У чэрвені 2023 года яна была на ўзроўні 1.927,1 рубля рубля (у гадавым вымярэнні рост на 17,79%).