На тэрыторыі мотавелазавода ў Мінску гарэлі пакрышкі
26 ліпеня, Позірк. Ліквідавана “загаранне пакрышак на плошчы 5 кв. м у асобным памяшканні ў цэху гатовай прадукцыі” у Мінску, паведаміла раніцай 26 ліпеня прэс-служба Міністэрства па надзвычайных сітуацыях.
Адзначаецца, што пажар адбыўся па адрасе пр. Партызанскі, 8. Гэта юрыдычны адрас ТАА “МотаВелаЗавод”, там жа знаходзіцца адна з фірмовых крам прадпрыемства.
Паводле інфармацыі МНС, пацярпелых няма, прычына здарэння высвятляецца.
6 сакавіка старшыня Мінгарвыканкама Уладзімір Кухараў заявіў, што да канца 2025 года будуць завершаныя ўсе работы па рэалізацыі інвестыцыйнага праекта “Рэканструкцыя тэрыторыі па прасп. Партызанскім, 8 у Мінску”, які мяркуе стварэнне ў гэтым месцы новага гарадскога тэхнапарку.
Былы ўладальнік Мінскага мотавелазавода і шклозавода “Ялізава” (Магілёўская вобласць) Аляксандр Мураўёў у 2017 годзе быў прыгавораны да 11 гадоў пазбаўлення волі з канфіскацыяй маёмасці. У сакавіку 2023 года стала вядома, што ён выйшаў на волю і з’ехаў за мяжу.
Мураўёва ў чэрвені 2015 года затрымаў КДБ у мінскім аэрапорце пры спробе паляцець з краіны. Бізнесмену інкрымінавалі чатыры “эканамічныя” крымінальныя артыкулы, уключаючы “махлярства ў асабліва буйным памеры”, “крадзеж шляхам злоўжывання службовымі паўнамоцтвамі” і “ўхіленне ад выплаты падаткаў”.
Уласнікам ААТ “Мотавела” і СЗАТ “Шклозавод Ялізава” Мураўёў стаў праз сваю аўстрыйскую кампанію ATEC Holding GmbH. Яго кампаніі кантралявалі таксама Гомельскі шклотарны завод, прадпрыемства “Белеўратара” (Ліда, Гродзенская вобласць), а таксама шклозавод у Смаленскай вобласці (Расія). У беларускіх СМІ Мураўёва называлі “шкляным каралём”.
У 2013 годзе падчас візіту на “Мотавела” Аляксандр Лукашэнка раскрытыкаваў яго кіраўнікоў за невыкананне праграм мадэрнізацыі прадпрыемства.
Пасля затрымання Мураўёва мотавелазавод перайшоў пад знешняе кіраванне, а пазней быў нацыяналізаваны. У 2015 годзе генеральным дырэктарам прадпрыемства быў прызначаны былы старшыня Мінгарвыканкама Мікалай Ладуцька.
15 жніўня 2022 года падчас наведвання мотавелазавода Лукашэнка выказаў незадаволенасць узроўнем лакалізацыі вытворчасці. Ён абурыўся, што прадстаўленая яму новая мадэль матацыкла цалкам сабраная з імпартных (кітайскіх) камплектавалых. Неўзабаве пасля гэтага Ладуцька быў звольнены.
Са снежня 2022 года мотавелазаводам кіруе Сяргей Манько. На працу ў сталіцу яго перавялі з пасады намесніка дырэктара па маркетынгу і камерцыйных пытаннях Асіповіцкага завода аўтамабільных агрэгатаў (Магілёўская вобласць).
5 сакавіка 2021 года, наведваючы прадпрыемства, Лукашэнка распарадзіўся “па-гаспадарску падысці да гэтай тэрыторыі”, назваўшы яе “залатым дном”: “Але ніякага жытла. Тут павінна быць вытворчасць, і высокатэхналагічная вытворчасць”.
“Трэба зрабіць узорны тэхнапарк і на яго ўзор развіваць у іншых гарадах і месцах. У гэтай пяцігодцы мы павінны мець суперузорную вытворчасць на гэтай пляцоўцы, і мотавелазавод застанецца такім жа брэндам для беларусаў, як некалі быў. Мы павінны ўсё зрабіць, каб атрымаць добрую вытворчасць”, — сказаў ён.